विराटनगर — औद्योगिक नगरी विराटनगरमा बिहीबारदेखि सुरु भएको कोशी प्रदेश लगानी सम्मेलनको उद्घाटन गर्दै प्रधानमन्त्री केपी शर्मा ओलीले कोशीलाई लगानीको ‘हटस्पट’को रूपमा प्रस्तुत गरेका छन् ।

वीरेन्द्र सभागृहमा आयोजित भव्य कार्यक्रममा प्रधानमन्त्री ओलीले भौतिक पूर्वाधार, बलियो सडक सञ्जाल, कानुनी सुधार र अनुकूल भूराजनीतिक अवस्थालाई कोशी प्रदेशको लगानीमैत्री विशेषता बताउँदै उद्योग सञ्चालनका लागि अब कुनै बहाना नरहेको स्पष्टसमेत पारे । 

प्रधानमन्त्री ओलीले प्रदेशभर फैलिएको सडक सञ्जाललाई कोशीको औद्योगिक भविष्यका लागि निर्णायक आधारका रूपमा उल्लेख गरे । उनले हुलाकी राजमार्गअन्तर्गत कनकाई र कमलामा पुल निर्माण सम्पन्न भएसँगै चितवनसम्मको यातायात सहज भएको बताए । ‘माथिल्लो क्षेत्रमा एसियन मापदण्डअनुसार राजमार्ग निर्माण भइरहेको छ, उद्योग सञ्चालन हुँदासम्म आवश्यक सडक पूर्वाधार तयार भइसकेको हुनेछ,’ उनले भने ।

लगानीमैत्री पूर्वाधारका सम्भावनामा जोड दिँदै प्रधानमन्त्री ओलीले नेपाल–भारत सीमाबाट सामान आयात–निर्यात गर्न कोशी र कर्णाली नदीमार्फत जलमार्गको प्रयोग सम्भव भएको बताए । पानीजहाज सञ्चालनको सम्भावनाबारे अध्ययन भइरहेको जनाउँदै उनले यो उपाय ढुवानीलाई सहज, सस्तो र प्रभावकारी बनाउने विकल्पका रूपमा प्रस्तुत गरे । साथै, विराटनगर विमानस्थलको विस्तार गरिने घोषणा गर्दै उनले कोशी प्रदेशलाई आन्तरिक तथा अन्तर्राष्ट्रिय आवागमनको केन्द्र बनाइने दाबी गरे ।  लगानीकर्तालाई निर्धक्क रूपमा अघि बढ्न आह्वान गर्दै ओलीले भने, ‘अब डराउनु पर्दैन, ढुवानीको बाटो खुलेको छ र सुरक्षाको जिम्मा सरकारले लिन्छ ।’

कोशी प्रदेशका मुख्यमन्त्री हिक्मतकुमार कार्कीले प्रदेश सरकार लगानीकर्ताको ‘गारन्टर’ बन्न तयार रहेको दाबी गर्दै, निजी क्षेत्रको भरोसा जित्ने स्पष्ट सन्देश दिए । उनले प्रदेशमा लगानीका अवरोध हटाउन आठ वटा कानुन अध्यादेशमार्फत संशोधन गरिसकेको जानकारी दिँदै भने, ‘अब लगानी गर्न डराउनुपर्ने अवस्था छैन, झन्झट अन्त्य गरेर लगानीलाई पूर्ण रूपमा सुरक्षित बनाइनेछ ।’