सोलुखुम्बु — सगरमाथा क्षेत्रमा व्यावसायिक हेलिकोप्टर उडानमा पुनः खुम्बु पासाङल्हामु गाउँपालिकाले रोक लगाएको छ । यसअघि जिल्ला प्रशासन कार्यालयमा भएको सरोकारवालाको बैठकमा हेलिकोप्टर उडानमा केही लचक भएको पालिका फेरि प्रतिबन्ध गराउने निष्कर्षमा पुगेको हो ।

सगरमाथा राष्ट्रिय निकुन्जले हेली उडाउन लगाएको प्रतिबन्ध फुकुवा गरेसँगै हेलिकोप्टर कम्पनीहरुले व्यावसायिक उडान थालेका थिए । आरोहण सिजन सुरु भएसँगै खुम्बु क्षेत्रमा दैनिक दर्जनौं हेलिकोप्टरले व्यावसायिक उडान गरिरहेका बेला स्थानीय सरकारले सोमबार विज्ञप्ति जारी गर्दै उडानमा प्रतिबन्ध लगाएको हो । 

गाउँपालिका अध्यक्ष मिङ्माछिरि शेर्पाले विज्ञप्ति जारी गर्दै लुक्लाभन्दा माथि रेस्क्यु, कार्गो र माउन्टेन फ्लाइट बाहेक अन्य सबै प्रकारका व्यावसायिक  हेलिकोप्टर उडानहरु पूर्णरुपमा निषेध गरिएको बताएका छन् ।  पालिकाले अव्यवस्थित हेलिकोप्टर उडानका कारण वन, वातावरण, जैविक विविधता, स्थानीय व्यापार व्यवसाय र पर्यटकीय गतिविधिहरुमा नकारात्मक असर परेको दाबी गरेको छ ।