काठमाडौँ — शिक्षकहरु काठमाडौंको सडकमा आफ्ना मागसहित झन्डै एक महिनादेखि प्रदर्शनमा छन् । सरकारको बेवास्ताका कारण उनीहरुको प्रदर्शन कहिलेसम्म चल्ने हो कुनै टुंगो छैन । त्यसैमा केही दिनअघिदेखि चिकित्सकहरुको आन्दोलन पनि थपिएको छ ।

देशमा शिक्षक र चिकित्सकमात्र हैन विभिन्न संघसंस्था तथा राजनीतिक दलले वैशाख १ गतेदेखि १३ गतेसम्म १६९ ठाउँमा तालाबन्दी, ८१ वटा विरोध र्‍याली/सभा, ७९ वटा धर्ना, ८ वटा कोण सभा र ४ हडताल गरेको प्रहरी प्रधान कार्यलय नक्सालको तथ्यांकमा छ ।

हडताल भने कोशी प्रदेशमा मात्र भएको प्रहरीले बताएको छ । यो अवधिमा ७ वटा सडकमा अवरोध भएका छन् भने ३ वटा सवारी साधन तोडफोड भएका छन् । प्रहरी तथ्यांक अनुसार एक जना प्रहरीसहित ३ जना घाइते भएका छन् । प्रहरीले १३ दिनमा १२ जनालाई पक्राउ गरेर अनुसन्धान गरेको छ । यसका साथै ४ जनाले आफ्नो मागसहित अनसन बसेका छन् । यी विरोध कार्यक्रममा १४ हजार ८८ सुरक्षाकर्मी खटिएका थिए ।

यसरी हेर्दा नयाँ वर्षको सुरुवातसँगै देशभर आन्दोलनको लहर चलेको देखिन्छ । जसले आम नागरिकको दैनिकीमा प्रत्यक्ष असर गरेको छ । प्रदर्शन र आन्दोलनले ट्राफिक अस्तव्यस्त भएको छ भने यात्रुहरुले समेत सडकमा सास्ती पाएका छन् ।

आइतबार मात्र शिक्षकहरुको आन्दोलनमा प्रहरी र शिक्षकबीच मुठभेड हुँदा पाँच प्रहरी, एक पत्रकारसहित ६२ शिक्षक घाइते भएका छन् ।

प्रदेशको कुरा गर्ने हो भने लुम्बिनी प्रदेशमा कुनै पनि प्रकारका विरोध कार्यक्रम भएका छैनन् । वैशाख १३ गतेसम्म सबैभन्दा धेरै विरोध, र्‍याली, सभा र तालाबन्दी बागमती प्रदेशमा भएको छ । बागमती प्रदेशमा यो समयमा ५१ विरोध र्‍याली र सभा भए । त्यसमध्ये २८ वटा र्‍याली काठमाडौं उपत्यकाभित्र भएका हुन् । 

यस्तै, कोशी र मधेश प्रदेशमा ९/९ वटा विरोध र्‍याली र सभा भएका थिए । गण्डकी प्रदेशमा ४, कर्णाली प्रदेशमा ६ र सुदूरपश्चिम प्रदेशमा २ वटा विरोध र्‍याली र सभाका कार्यक्रम भएको प्रहरी प्रधान कार्यलयले जनाएको छ । सुदूरपश्चिम, कर्णाली, गण्डकी, कोशीमा एक/एक ठाउँमा तालाबन्दी हुँदा बागमती प्रदेशभित्र १६५ ठाउँमा तालाबन्दी भएका थिए । त्यसमध्ये पनि १६४ वटा तालाबन्दीको घटना काठमाडौं उपत्यकाभित्रको हो ।