ओपीडीमा आएका बिरामी उपचार नपाएर फर्कन बाध्य
काठमाडौँ — आवासीय चिकित्सकलाई सरकारी आठौं तह सोसरह मासिक निर्वाह भत्ता उपलब्ध गराउन माग राख्दै आन्दोलरत चिकित्सकले शुक्रबार देशभरका सरकारी अस्पतालमा आकस्मिक बाहेकका सेवा ठप्प पारेका छन् ।
नेपाल चिकित्सक संघको आह्वानमा सरकारी अस्पताल, स्वास्थ्य विज्ञान प्रतिष्ठान, मेडिकल कलेज, ओपीडी सेवा बन्द भएको चिकित्सकहरुले बताए । संघका अध्यक्ष अनिलविक्रम कार्कीले बिहीबार साँझ विज्ञप्ति जारी गरेर आकस्मिक बाहेकका सेवा बन्द गर्न अपिल गरेका थिए ।
देशभरका अधिकांश सरकारी अस्पताल, मेडिकल कलेज र केही निजी अस्पतालको समेत सेवा अवरुद्ध भएको संघले जनाएको छ । ओपीडीमा आएका बिरामी भने उपचार नपाएर फर्कन बाध्य भएको विभिन्न अस्पतालहरुले जनाए । काठमाडौं उपत्यकाका वीरलगायत ठूला अस्पतालमा पनि ओपीडी सेवा सञ्चालन हुन सकेन । काठमाडौं उपत्यकाका चिकित्सक सेवा रोकेर माइतीघरमा धर्नामा सहभागी भएका थिए ।
आवासीय चिकित्सक एक महिनादेखि निर्वाह भत्ताको माग गर्दै आन्दोलनमा छन् । उनीहरुको आन्दोलनमा चिकित्सक संघले पनि ऐक्यबद्धता जनाएपछि देशभरका स्वास्थ्य संस्थामा सेवा प्रभावित बनेको हो । चिकित्सा शिक्षा आयोगले फागुनदेखि मासिक साढे ४८ हजार निर्वाह भत्ता उपलब्ध गराउनुपर्ने निर्णय गरे पनि निजी मेडिकल कलेजले त्यसलाई निर्णय अस्वीकार गर्दै आएका छन् । भत्ता उपलब्ध गराउँदा घाटा हुने निजी मेडिकल एसोसिएसनले जनाएको छ ।
