काठमाडौँ — शिक्षा, विज्ञान तथा प्रविधिमन्त्री विद्या भट्टराईले राजीनामा दिएपछि विद्यालय शिक्षा विधेयकमाथिको दफावार छलफलमा मंगलबार भूमि व्यवस्था, सहकारी तथा गरिबी निवारणमन्त्री बलराम अधिकारी सहभागी भएका छन् ।

शिक्षा सचिव दीपक काफ्लेले मन्त्री अधिकारीको उपस्थितिमा विधेयकमाथि छलफल भएको जनाए । संसद्‍को शिक्षा, स्वास्थ्य तथा सूचना प्रविधि समितिअर्न्तगतको उपसमितिमा विद्यालय शिक्षा विधेयकमाथि दफावार छलफल जारी छ ।

वैशाख २३ सम्म उपसमितिलाई प्रतिवेदन बुझाउन समयसीमा तोकिएको छ । ‘शिक्षामन्त्रीको अनुपस्थितिमा विधेयकमाथि छलफल अघि बढाउन प्रधानमन्त्री कार्यालयले भूमि व्यवस्था मन्त्रीलाई जिम्मेवारी दिएको छ,’ सचिव काफ्लेले भने ।

शिक्षक आन्दोलन चर्कँदै जाँदा प्रधानमन्त्रीसँगको असन्तुष्टि र असहयोगका कारण भट्टराईले सोमबार राजीनामा दिएकी थिइन् । राजीनामा भने स्वास्थ्यको कारण देखाइएको छ । उनले शिक्षकका केही माग सम्बोधन गर्न ७ बुँदे प्रस्ताव मन्त्रिपरिषद्‌मा प्रस्ताव गरेकी थिइन् । तर प्रस्तावमा प्रधामन्त्री केपी शर्मा ओली र अर्थमन्त्री विष्णु पौडेल सकारात्मक नभएपछि राजीनामा दिएको शिक्षा मन्त्रालयका अधिकारीहरु बताउँछन् ।

पछिल्लो समय शिक्षक आन्दोलन चर्किँदै गए पनि प्रधानमन्त्री र शिक्षामन्त्रीबीच त्यसअघिदेखि नै समन्वयमा कमी रहेको देखिएको थियो ।