अभिभावक भन्छन्– ‘छोरीको भविष्य बर्बाद हुनुभन्दा गर्भपतन गरिदिनुस् भनेर हारगुहार गर्यौं तर कानुनले नमिल्ने रहेछ, अब राज्यले नै व्यवस्थापन गरिदेओस्’
अछाम — मामा पर्नेबाट बलात्कृत भएकी अछाम, चौरपाटीकी १२ वर्षीया बालिकाले छोरी जन्माएकी छन् । बलात्कारका आरोपित भने प्रहरीमा जाहेरी दिएको दुई महिना बित्दा पनि पक्राउ परेका छैनन् । अभिभावकले छोरीको पेट ठूलो देखेपछि कुनै रोग लागेको शंकामा गत २ फागुनमा बयालपाटा अस्पतालमा जचाउँदा गर्भवती भएको पत्ता लागेको थियो ।
अभिभावकलाई बयालपाटा अस्पताल र जिल्ला अस्पताल अछामले २५ सातामाथिको गर्भपतन गराउन नसक्ने बताएपछि बालिकालाई एकद्वार संकट व्यवस्थापन केन्द्र (ओसीएमसी) कैलालीले हेर्ने गरी सुरक्षित आवास गृहमा राखिएको थियो । ती बालिकाले २९ चैतमा सेती प्रादेशिक अस्पताल धनगढीमा छोरी जन्माएकी हुन् ।
बालिकाका बुबाले अछामबाट धनगढी झरेर अस्पतालमा प्रसूति गराउने कागजातमा संरक्षकका रूपमा हस्ताक्षर गरेका थिए । उनी घर फर्किसकेका छन् । बालिकाकी आमा पनि गर्भवती थिइन् । उनले १५ फागुनमा मृत बच्चा जन्माइन् । ‘श्रीमतीले मृत बच्चा जन्माउनुको पीडा छ, अर्कातिर नाबालिक छोरीको अवस्था त्यस्तो छ । छोरीको चिन्ताले आमाको पनि ज्यान खतरामा छ,’ बालिकाका बुबाले भने ।
सुत्केरी छोरीलाई बच्चासहित घरमा ल्याउन सक्ने अवस्था नरहेको पनि उनले बताए । ‘गाउँ, समाजका अगाडि कसरी छोरीलाई ल्याउने ?’ उनले भने, ‘छोरीको भविष्य बर्बाद हुनुभन्दा जुन दिन थाहा भयो त्यसै दिन गर्भपतन गरिदिनुस् भनेर हारगुहार गरेको थिएँ । कानुनले नमिल्ने रहेछ । अब राज्यले नै व्यवस्थापन गरिदेओस् ।’
सेती प्रादेशिक अस्पतालका स्त्री तथा प्रसूति रोग विशेषज्ञ डा. खगेन्द्र भट्टका अनुसार नवजात शिशुलाई ६ दिनसम्म एनआईसीयू (नवजात शिशुको सघन उपचार कक्ष) मा राखेर बुधबार निकालिएको छ । ती बालिकाको स्वास्थ्य अवस्थालाई मध्यनजर गरेर अस्पतालमा नै राखिएको उनले बताए । ‘बालिकाको स्वास्थ्य अवस्था ख्याल गर्दै हामीले नर्मल डेलिभरी गरायौं । बालिकाको पुनःस्थापनालगायतका विषयमा अब सरोकारवालाले ध्यान दिनुपर्छ,’ उनले भने ।
अपरिपक्व उमेरमा बच्चा जन्माउनेमा विभिन्न खालका स्वास्थ्य समस्या देखिने र भविष्यमा पाठेघरको मुखको क्यान्सरको समेत जोखिम रहने पनि डा. भट्टले बताए । ‘अहिलेको अवस्थामा बालिका कुपोषित भएको जस्तो देखिन्छ । यसरी हिंसामा परेकाहरूको
मानसिक स्वास्थ्य पनि ठिक हुँदैन । जीवनभर स्वास्थ्यको निकै ख्याल गर्नुपर्छ,’ उनले भने । यसभन्दा अगाडि अस्पताल र ओसीएमसीले बालिकालाई संरक्षण गरेको र अब राज्यका निकायले जिम्मेवारी लिनुपर्ने उनको उनको भनाइ छ ।
भारतको सुरतमा एकै घरको अर्को कोठामा बस्ने मामा पर्ने पुरुषले आफूलाई पटकपटक बलात्कार गरेको र घरमा सुनाए मार्ने धम्कीसमेत दिएको जानकारी ती बालिकाले प्रहरी र परिवारलाई दिएकी थिइन् । बालिका सुरतमा मजदुरी गरिरहेका बाबु–आमासँग बस्थिन् । बालिकाको भनाइका आधारमा ४ फागुनमा जिल्ला प्रहरी कार्यालयमा उजुरी दर्ता गरिएको थियो । आरोपित भारतमा भएकाले पक्राउ पर्न नसकेको प्रहरीको भनाइ छ ।
ती बालिकाकी आमाका अनुसार अछाममा जाहेरी दिएको भोलिपल्ट ती आरोपित पुरुषलाई आफन्तले नियन्त्रणमा लिएर भारतको सुरत सहरस्थित आदजान प्रहरी कार्यालयमा बुझाएका थिए । प्रहरीमा बुझाएको २४ घण्टासम्म कुनै जाहेरी नआएपछि भारतीय प्रहरीले थुनामुक्त गरेको थियो । आफूहरू आर्थिक रूपमा कमजोर भएकै कारण भारतमा पक्राउ परिसकेको मान्छे भागेको पीडित बालिकाकी आमा बताउँछिन् ।
उजुरी दिएको दुई महिना बितिसक्दा पनि आरोपित पक्राउ नपरेकाले न्याय पाउने आस मर्दै गएको उनको भनाइ छ । ‘छोरीको भविष्य बर्बाद भयो । परिवारको खुसी लुटियो । इन्डिया गएर कमाइ गर्नलाई पनि अब हामीलाई सजिलो छैन । पक्राउ नपरे त्यसले हामीलाई सिध्याइदिन्छ,’ उनले भने ।
अछामका प्रहरी प्रमुख डीएसपी ईश्वरीप्रसाद भण्डारीले आरोपित पक्राउ गर्न इन्टरपोलमार्फत प्रक्रिया अगाडि बढाइएको जानकारी दिए । ‘नेपाल प्रहरीले आफैं भारतमा गएर पक्राउ गर्न मिल्दैन । सक्ने प्रयास सबै गरिरहेका छौं,’ उनले भने ।
