काठमाडौँ — हुम्लामा बिहीबार बिहानको वर्षापछि बाढीपहिरोले क्षति पुर्‍याएको छ । अदानचुली गाउँपालिका वडा नम्बर २ र ३ मा वर्षाले क्षति गरेको हुम्लामा प्रमुख जिल्ला अधिकारी नारायण पाण्डेयले जानकारी दिए । 

कान्तिपुरसँगको कुराकानीमा प्रमुख जिल्ला अधिकारी पाण्डेयले भने, 'आज बिहान अदानचुली-२ र ३ मा अलि ठूलै पानी पर्‍यो । केही घरहरूमा पनि क्षति पुगेको भन्ने प्रारम्भिक जानकारी आएको छ । क्षतिको विवरण संकलनको काम भइरहेको छ । '

पाण्डेयका अनुसार वडा नम्बर २ र ३ को बीचमा रहेको खाद्य व्यवस्था तथा व्यापार कम्पनी लिमिटेडको गोदाममा समेत पानीले क्षति पुगेको छ । उनका अनुसार गोदाममा रहेको चामल सुरक्षित स्थानमा सारिए पनि तल्लो लहरमा रहेका चामलका बोरा भने भिजेका छन् ।

तस्बिर सौजन्य : जिल्ला प्रशासन कार्यालय, हुम्ला

गाउँपालिका अध्यक्ष मोहनविक्रम सिंहका गाउँपालिका कार्यालयसमेत पहिरोको जोखिममा परेको छ । उनले भने, करिब १०० वटा जति भेडाबाख्रा मरेको भन्ने छ । त्यस्तै केही घरहरू बस्नै नमिल्ने गरी भत्किएका छन् । पसलहरूमा समेत क्षति पुगेको छ ।' उनका अनुसार बिहान केहीबेर भारी वर्षा भए पनि अहिले कम हुँदै गएको छ ।