काठमाडौँ — जलवायु परिवर्तनबारे छलफलका लागि हुन लागेको 'सगरमाथा संवाद'लाई सर्वपक्षीय र समावेशी बनाउन प्रमुख प्रतिपक्षी माओवादीले प्रधानमन्त्री केपी शर्मा ओलीको ध्यानाकर्षण गराएको छ । 

माओवादीको वन, वातावरण तथा जलवायु विभाले प्रधानमन्त्री ओलीलाई बुधबार सगरमाथा संवादबारे ध्यानाकर्षणपत्र बुझाएको छ । विभागका प्रमुख माधव सापकोटाले प्रधानमन्त्रीलाई बुझाएको पत्रमा विगतदेखि नेपालको जलवायु कूटनीति तथा हिमाली संरक्षणका क्षेत्रमा भएका महत्वपूर्ण योगदानहरूको समावेश नगरी संवादको तयारी अघि बढाइएकोप्रति पार्टीको गम्भीर चासो रहेको उल्लेख गरिएको छ । 

माओवादीले जलवायु परिवर्तनबारे सबै पक्षको सहभागिता र पहलकदमी अपरिहार्य रहेको भन्दै प्रधानमन्त्रीको ध्यानाकर्षण गराएका हुन् । 'जलवायु परिवर्तनजस्तो विश्वव्यापी र बहुआयामिक चुनौतीको सामना गर्न सबै पक्षको सहभागिता र पहलकदमी अपरिहार्य छ । तर सगरमाथा संवादको तयारी प्रक्रियामा सरकार र सरकारनिकट व्यक्तिहरूको मात्र सहभागिता देखिनु विडम्बनापूर्ण छ,' माओवादीले भनेको छ, 'यो संवादलाई सत्तापक्षको कार्यक्रममा सीमित नराखी सम्पूर्ण राजनीतिक दल, निजी क्षेत्र, नागरिक समाज, विज्ञ समुदाय र आम जनताको साझा मञ्चको रूपमा स्थापित गरिनु पर्दछ । यसले मात्र संवादको विश्वसनीयता, प्रभावकारिता र राष्ट्रिय स्वामित्व सुनिश्चित गर्दछ ।'