काठमाडौँ — प्रधानमन्त्री केपी शर्मा ओलीले त्रिभुवन विश्वविद्यालयका उपकुलपति केशरजंग बरालको राजीनामा बिहीबार स्वीकृत गरेका छन् । बरालले १५ चैतमै राजीनामा दिएको भए पनि सनाखत (उनकै भए/नभएको यकिन) गर्नुपर्ने भन्दै रोकेर राखिएको थियो । दुई सातापछि राजीनामा स्वीकृत गरिए पनि निमित्त उपकुलपतिको जिम्मेवारी तोकिएको छैन । प्रधानमन्त्री एवं कुलपति ओलीको असहयोग र हस्तक्षेप रहेको भन्दै बरालले पदबाट राजीनामा दिएका हुन् ।

प्रधानमन्त्री नियुक्त भएदेखि नै ओलीले असहयोग गरेको र पछिल्लो समय विश्वविद्यालयको स्वायत्ततामा समेत हस्तक्षेप गरेको उनको आरोप छ । विश्वविद्यालयको सुधारको काम गर्न खोज्दा सत्तारूढ एमालेलगायतका राजनीतिक दलबाट असहयोग भएको बरालले बताए । उनी गत वर्ष १० फागुनमा प्रतिस्पर्धाका आधारमा उपकुलपति नियुक्त भएका थिए । त्यति बेला कुलपति एवं प्रधानमन्त्री पुष्पकमल दाहाल थिए । 

बरालले उपकुलपतिबाट राजीनामा दिएपछि नै त्रिविमा दैनिक प्रशासनिक काम ठप्प छ । त्रिवि ऐनमा उपकुलपति अनुपस्थिति रहे ३ महिनाका लागि रेक्टरले निमित्तको जिम्मेवारी लिन सक्ने व्यवस्था छ । त्यहीअनुसार त्रिविमा रेक्टरले निमित्त चलाउने अभ्यास छ । यसअघि धर्मकान्त बाँस्कोटाको कार्यकाल सकिएपछि रेक्टर शिवलाल भुसाल र तीर्थ खनियाँको कार्यकाल सकिँदा रेक्टर सुधा त्रिपाठीले निमित्तको जिम्मेवारी पाएका थिए । 

ऐनमा कुलपतिले बढीमा ३ महिनाका लागि उपकुलपतिको जिम्मेवारी वरिष्ठतम प्राध्यापकलाई दिन सक्ने व्यवस्था पनि छ । रेक्टरलाई अहिले निमित्त नतोकिएकाले कुलपति ओलीले कोहीलाई जिम्मेवारी दिन खोजेको प्राध्यापकहरूको अनुमान छ । 

निमित्त नतोकिए विश्वविद्यालयको दैनिक प्रशासनिक काम झनै अनिश्चित बन्ने प्राध्यापकहरू बताउँछन् । उपकुलपति नियुक्तिका लागि शिक्षामन्त्री तथा सहकुलपतिको संयोजकत्वमा सिफारिस समिति गठन हुने प्रावधान छ । समिति गठन, उपकुलपति सिफारिस र नियुक्तिका लागि केही साता लाग्नेछ ।