काठमाडौँ — वायु प्रदूषण बढेसँगै धुलोका कण प्रशोधन गरेर हावा शुद्ध पार्ने एयर प्युरिफायरको बिक्री बढ्न थालेको छ । ललितपुरको झम्सीखेलस्थित क्लिन एयर स्टोरका कर्मचारी सलित महर्जनले पछिल्लो एक सातामा आफूले सय थान एयर प्युरिफायर बेचेको बताए ।

क्लिन एयर स्टोरमा पसलमा २२ हजारदेखि १ लाखसम्म पर्ने एयर प्युरिफायर छन् । सलितले आफूहरूकहाँ स्विडिस ब्रान्ड ब्लु एअरको ९६ हजार पर्नेसम्मको एअर प्युरिफायर रहेको बताए । क्लिन एयरकी कर्मचारी स्वेच्छा श्रेष्ठले कोठाभित्र हावा बहने ठाउँ नहुने भएकाले बाहिरको भन्दा ५ गुणा धेरैसम्म प्रदूषित वायु हुने बताउँदै प्युरिफायरले हावामा रहेको कणलाई प्रशोधन गरेर कोठाभित्रको हावा स्वच्छ पार्न सघाउने बताइन् ।

भक्तपुरस्थित श्रीराम इलोक्ट्रोनिक्सका सञ्चालक अशोक रानाले आफूकहाँ हरेक दिन एयर प्युरिफायरका बारेको सोध्न र किन्न आउने ग्राहक हुने गरेको अनुभव सुनाए । उनले पछिल्ला केही दिनयता हरेक दिन चार वटासम्म एअर प्युरिफायर बेचिरहेको बताए । दम, धुलोको एलर्जी भएका,  बूढाबूढी र बालबालिका भएकाहरूले एअर प्युरिफायर किन्न खोजिरहेको बताउँदै उनले यसले दूषित हावालाई प्रशोधन गरेर स्वच्छ हावा फ्याँक्ने बताए ।