काठमाडौँ — पत्रकारिता क्षेत्रमा डेढ दशक भन्दा लामो समयदेखि क्रियाशील कान्तिपुरकर्मी बुद्धिसागर मरासिनी सम्मानित भएका छन् । मरासिनीलाई काठमाडौंस्थित नेपाल पर्यटन बोर्डमा बुधबार आयोजित 'नेपाल-अस्ट्रेलिया सांस्कृतिक तथा सम्मान कार्यक्रम-२०२५' का अवसरमा सम्मान गरिएको हो ।
उनलाई वैदेशिक मामिला, विदेशस्थित नेपाली समाज, युवा, पर्यटन तथा संस्कृति लगायतका क्षेत्रमा पत्रकारिता मार्फत पुर्याएको योगदानको कदर गर्दै सम्मानित गरिएको हो । मरासिनीलाई वन तथा वातावरण राज्यमन्त्री रूपा विकले नगद तथा सम्मान पत्र प्रदान गरिन ।
कार्यक्रममा कान्तिपुरकर्मी मरासिनीसहित पत्रकार राजन पोखरेल, ग्रेट स्तुपा अफ युनिभर्सल कम्प्यासनका संस्थापक इयान ग्रीन 'ओएएम' तथा साइनो टेलिसिरियलका कलाकारलाई पनि सम्मानित गरियो ।
अस्ट्रेलियाको भिक्टोरिया राज्यस्थित ग्रेट स्तुपा अफ युनिभर्सल कम्प्यासन विश्वकै महत्वपूर्ण बौद्ध सम्पदाहरूमध्ये एक हो। लुम्बिनीस्थित बौद्धनाथ स्तुपाको प्रतिरूपमा निर्माण गरिएको यस स्तुपाले बुद्ध धर्म, शान्ति, ध्यान, र संस्कृतिको प्रवर्द्धन गर्दै आएको छ ।
धौलागिरी एडभेन्चर प्रालिको आयोजना तथा मौलिक फिल्म्स प्रालिको सह-आयोजनामा आयोजित नेपाल-अस्ट्रेलिया सांस्कृतिक तथा सम्मान कार्यक्रम-२०२५' मा दुई देशका विज्ञहरूले पर्यटन तथा संस्कृतिका विभिन्न विषयमा छलफल गरेका थिए ।
