काठमाडौँ — सागरनाथ वन विकास परियोजना, सर्लाहीमा कार्यरत १९० जना कामदारले ११ महिनादेखि तलब नपाएपछि आफ्नो गुनासो सुनाउन काठमाडौं आएका छन् । 

वन विकास परियोजना मजदुर यूनियनका अध्यक्ष सन्तोष साह तेलीले दैनिक ज्यालादारीमा काम गर्ने कर्मचारीले लामो समयदेखि काम गरेको तलब नपाएपछि ध्यानाकर्षण गराउन काठमाडौं आएको बताए ।

उनीहरूले आइतबार (चैत २४) विज्ञप्ति जारी गर्दै प्रधानमन्त्री तथा मन्त्रिपरिषद् कार्यालय र वन तथा वातावरण मन्त्रालयको ध्यानाकर्षण गराएका हुन् । ‘काम गर्नेमा ८/९ जना महिला हुनुहुन्छ । हामी ज्यालादारी काम गर्नेको मात्र करिब ६ करोड रुपैयाँ भुक्तानी हुन बाँकी छ,’ उनले भने, ‘यहाँ १० वर्षदेखि काम बढीमा ३०/३५ वर्ष देखि काम गरिरहेका छौं ।’ 

उनीहरूले सरकारसमक्ष तलब–भत्ता तत्काल उपलब्ध माग गरेका छन् । साथै सागरनाथ वन विकास परियोजनाले चार दशकदेखि वृक्षरोपण, वन व्यवस्थापन गरी राजस्व संकलन, वातावरण सन्तुलन र स्थानीय रोजगारी सृजनामा योगदान पुर्‍याउँदै आएको तर वन पैदावर विकास समिति र वन तथा वातावरण मन्त्रालयलगायतका केन्द्रीय निकायबाट नीतिगत निर्णयमा भएको वेवास्ता र ढिलाईका कारण गम्भीर समस्यामा देखा परेको उनको भनाइ छ ।

२०८१ भदौ १७ गतेदेखि वन पैदावर विकास समितिको कार्यकारी अध्यक्षको पद रिक्त भएकाले नीतिगत निर्णय हुन नसकेको विज्ञप्तीमा छ । सागरनाथ वन परियोजनाले आर्थिक वर्ष २०८१/८२ का लागि प्रस्ताव गरेका वार्षिक कार्यक्रम स्विकृत नभएपछि करिब ४४ करोड रुपैयाँ बराबरको आम्दानी हुने काठको उत्पादन र बिक्री अवरुद्ध भएको विज्ञप्तिमा उल्लेख छ । 

‘परियोजनामा मौज्दात ५० हजार क्यूफिटभन्दा बढी काठ (टीक जातको गोलिया, बल्ली) घटाएर बिक्री गर्नुपर्ने मूल्य समेत प्रस्ताव गरी परियोजनाबाट पठाइएको भए निर्णय नहुँदा ५ करोड रुपैयाँ बन पैदावर नष्ट हुने अवस्थामा छ,’ विज्ञप्तीमा भनिएको छ, ‘वन संरक्षणको लागि क्याम्प खडा गरी गस्ती टोलीमा खटिएका वन संरक्षक न्यूनतम साधन र सामग्री नपाएर काम गर्न असहज परिस्थितिमा छन् ।’