काठमाडौँ — अराजकता फैलाएर संविधान र व्यवस्थाप्रति वितृष्णा फैलाउने उद्देश्यले राजावादी समूहले तीनकुनेमा हिंसा भड्काएको गृहमन्त्री रमेश लेखकले बताएका छन् । शुक्रबार प्रतिनिधिसभाको राज्य व्यवस्था तथा सुशासन समितिको बैठकमा गृहमन्त्री लेखकले चैत १५ गते काठमाडौंको तीनकुने क्षेत्रमा भएका घटनाको निष्पक्ष छानबिन हुने बताएका हुन् । 

आगामी दिनमा संविधान र व्यवस्था विरोधी अराजक गतिविधिलाई कानुनको दायरामा ल्याई नागरिकमा सुरक्षाको प्रत्याभूति दिलाउने र लोकतान्त्रिक अधिकारको निर्वाध उपभोग गर्न पाउने वातावरण निर्माण गर्ने कुरामा सरकार थप क्रियाशील भई काम गर्ने गृहमन्त्रीको भनाइ छ । 

'घटनाक्रमलाई विश्लेषण गर्दा यो नियोजित रूपमा अराजकता फैलाउने आपराधिक तथा विध्वंशात्मक कार्य हो भन्ने कुरामा विवाद हुनै सक्दैन। आफ्ना असहमतिहरू शान्तिपूर्वक राख्ने र जनमतबाट अनुमोदित हुने अधिकार सबैलाई संविधानले दिएको छ। तर अराजक शैलीमा भएको लुटपाट, तोडफोड र आगलागी तथा सुरक्षाकर्मीमाथि गाडी गुडाउनेसम्मको प्रयास अक्षम्य र भर्त्सनायोग्य छ,' गृहमन्त्री लेखकले भने । 

लोकतन्त्र मास्न खोज्नेहरूको पहिलो निशानामा सञ्चारजगत रहन्छ भन्ने कुरा सञ्चारगृहमा खोजीखोजी भएको आक्रमणबाट समेत पुष्टि हुने उनले बताए । सरकार सञ्चारकर्मी र सञ्चारगृहको सुरक्षामा संवेदनशील रहेको र पूर्णसूरक्षाको प्रबन्ध मिलाउने उनको प्रतिबद्धता छ ।

काठमाडौंको तिनकुनेमा शान्तिपूर्ण प्रदर्शन गर्ने भनी दुर्गा प्रसाईंको समूहले स्थानीय प्रशासनबाट अनुमति लिएका थियो । तर प्रसाईंले प्रहरीलाई नै आक्रमण गर्ने उद्देश्यले गाडी चलाएको पनि गृहमन्त्री लेखकको भनाइ छ ।  'प्रदर्शनका क्रममा अगुवामध्येका एक निज दुर्गा प्रसाईं स्वयंले दिउँसो बा. प्र. ०१–०२८ च. ०२०१ नं. को गाडी हाँकी अश्लील शब्द प्रयोग गर्दै र भिडलाई उत्तेजित बनाउँदै सुरक्षाकर्मीहरूलाई किच्ने नियतकासाथ सुरक्षा घेरा तथा ब्यारिकेडमाथि बलपूर्वक गाडी हाँकेपछि माहोल बिग्रिन पुगेको थियो।” लेखकले भन्नुभयो–“उक्त घटना लगत्तै भिड उत्तेजित भई सुरक्षाकर्मीमाथि ढुंगामुढा र सिसाका बोतललगायतका वस्तु प्रहार गरेका थिए,' उनले भने ।