काठमाडौँ — आइतबार सत्तापक्ष र विपक्षी सांसदको होहल्लापछि प्रतिनिधिसभाको बैठक १५ मिनेटका लागि स्थगित भएको छ ।
आज बिहान सवा ११ बजे बोलाइएको बैठक १ बजे मात्रै सुरु भएको थियो । बैठक सुरु भएलगत्तै दुवै पक्षका सांसदबीच चर्काचर्की भएको थियो । बैठकको प्रत्यक्ष प्रसारण भने गरिएको थिएन । सभामुखको सचिवालयले भने प्रावधिक समस्याका कारण प्रत्यक्ष प्रसारण नगरिएको दाबी गरेको छ ।
सत्ता पक्षले शुक्रबारको घटनाबारे प्रधानमन्त्री र गृहमन्त्रीले संसद्मा जवाफ दिन पाउनुपर्ने माग राखेका थिए । विपक्षी दलका सांसदहरूले नेपाल विद्युत् प्राधिकरणका कार्यकारी निर्देशक कुलमान घिसिङलाई पदमुक्त गरिएको विषयमा सरकारको जवाफ माग्ने अडान कायमै राखेका छन् । प्रमुख प्रतिपक्षी र सत्तापक्षका सांसदको चर्काचर्कीबीच सभामुख देवराज घिमिरेले १५ मिनेटका लागि बैठक स्थगित गरेका हुन् ।
