काठमाडौँ — विद्यार्थी संगठनको अवरोधका कारण त्रिभुवन विश्वविद्यालयका १५ आंगिक क्याम्पसमा स्वतन्त्र विद्यार्थी युनियनको निर्वाचन प्रक्रिया अवरुद्ध भएको छ । सत्तारूढ कांग्रेसनिकट नेविसंघ, एमालेनिकट अनेरास्ववियु, प्रतिपक्षी माओवादीनिकट अखिल क्रान्तिकारीलगायत संगठनको तालाबन्दी र निर्वाचन समितिका सदस्यमाथि धम्की जस्ता कारणले ती क्याम्पसमा स्ववियु निर्वाचन प्रभावित भएको निर्वाचन समितिहरूले जनाएका छन् ।

त्रिविका ६२ आंगिकमध्ये २२ क्याम्पस काठमाडौं उपत्यकाभित्र र ४० क्याम्पस बाहिर छन् । स्ववियु निर्वाचन केन्द्रीय अनुगमन तथा समन्वय समितिका अनुसार काठमाडौंका ६ र बाहिरका ९ क्याम्पसमा निर्वाचन अनिश्चित बनेको छ ।

विश्वविद्यालय क्याम्पस कीर्तिपुर, सरस्वती क्याम्पस सोह्रखुट्टे, पब्लिक युथ क्याम्पस धोबीचौर, शंकरदेव क्याम्पस पुतलीसडक, नेपाल ल क्याम्पस, विश्वभाषा क्याम्पस प्रदर्शनीमार्गलाई रोकिएको निर्वाचन प्रक्रिया अघि बढाउन समितिले आइतबार निर्देशन दिएको छ । 

सिद्धनाथ विज्ञान क्याम्पस महेन्द्रनगर, सुर्खेत बहुमुखी क्याम्पस, बुटवल बहुमुखी क्याम्पस, भैरहवा बहुमुखी क्याम्पस, पक्लिहवा क्याम्पस रूपन्देही, तेह्रथुम क्याम्पस, रामसागर रामस्वरूप क्याम्पस जनकपुर, वीरेन्द्र बहुमुखी क्याम्पस भरतपुर र कृषि क्याम्पस रामपुरलाई पनि निर्वाचन प्रक्रिया तत्काल अघि बढाउन पत्राचार गरिएको निर्वाचन समितिका सदस्यसचिव पशुपति अधिकारीले जानकारी दिए । ‘स्ववियु निर्वाचन सम्पन्न गर्नुपर्नेमा त्यस क्याम्पसमा के कति कारणले हुन नसकेको हो ? सम्बद्ध पक्षसँग समझदारी कायम गरी जुन अवस्था र प्रक्रियामा रोकिएको हो, सोही अवस्था र प्रक्रियाबाट निर्वाचन कार्य तत्कालै अघि बढाउन निर्देशन गरिन्छ,’ क्याम्पसलाई पठाइएको पत्रमा भनिएको छ । 

त्रिविअन्तर्गतका आंगिक, सम्बन्धनप्राप्त सामुदायिक र निजी क्याम्पसमा विद्यार्थी कल्याण र हकहितका लागि स्थापित साझा संस्था स्ववियुको निर्वाचन ५ चैतका लागि तोकिएको छ । केही सामुदायिक क्याम्पसमा पनि विद्यार्थी संगठनकै असहयोगले निर्वाचन कार्यतालिका प्रभावित भएको त्रिविले जनाएको छ । कतिपय क्याम्पसमा भने २०७९ मा निर्वाचित स्ववियु अध्यक्षलगायत पदाधिकारीले अवरोध गरिरहेको निर्वाचन समितिहरूले जनाएका छन् । स्ववियु निर्वाचन हुन नसके ६/६ महिनासम्म कार्यकाल थप हुन सक्ने प्रावधानका कारण कतिपय पदाधिकारीले निर्वाचन टार्न खोजेको क्याम्पस प्रमुखहरूको भनाइ छ । 

नेविसंघको आन्तरिक गुटबन्दीका कारण केही क्याम्पसमा निर्वाचन अवरुद्ध भएको आरोप अनेरास्ववियुले लगाएको छ । नेविसंघले भने आरोप/प्रत्यारोपभन्दा पनि संवाद र सहकार्यबाट विवादको निरूपण गर्नुपर्नेमा जोड दिएको छ । नेविसंघका अध्यक्ष दुजाङ शेर्पा र अनेरास्ववियुका अध्यक्ष समिक बडालले छुट्टाछुट्टै विज्ञप्ति जारी गर्दै स्ववियु निर्वाचनमा प्रतिबद्ध रहेको समेत जनाएका छन् ।

त्रिवि विश्वविद्यालय क्याम्पसमा नेविसंघसहित स्ववियुका पदाधिकारीको मिलेमतोमा तालाबन्दी गरिएको विद्यार्थीको गुनासो छ । तालाबन्दी खुलाउन र निर्वाचन अघि बढाउन त्रिवि उपकुलपति लगायतले राजनीतिक नेतृत्व र विद्यार्थी प्रतिनिधिसँग वार्ता गरे पनि सफल हुन सकेको छैन । नेपाल ल क्याम्पसमा अनेरास्ववियुले निर्वाचन कार्यतालिका च्यातेपछि अवरोध भएको एक अध्यापकले बताए । विश्वभाषा क्याम्पसमा अखिल क्रान्तिकारीको तालाबन्दीका कारण निर्वाचन स्थगन गरिएको छ । पब्लिक युथ क्याम्पसमा नेविसंघको अवरोधका कारण चुनावी प्रक्रिया अवरुद्ध बनेको निर्वाचन समितिले जनाएको छ । शंकरदेव क्याम्पसमा अनेरास्ववियु लगायत विद्यार्थीले तालाबन्दी गरेपछि निर्वाचन कार्यतालिका अवरुद्ध बनेको छ । सरस्वती क्याम्पसमा अनेरास्ववियु लगायतका विद्यार्थी संगठनको अवरोध छ ।

विद्यार्थी संगठनका केन्द्रीय समितिले गठबन्धन नगर्ने नीति लिए पनि नेविसंघ र अनेरास्ववियु, अनेरास्ववियु र अखिल क्रान्तिकारी, नेविसंघ र अखिल क्रान्तिकारी, अनेरास्ववियु र अनेरास्ववियु (एकीकृत समाजवादीनिकट), नेविसंघविरुद्ध कम्युनिस्ट पार्टीनिकट विद्यार्थी संगठनबीच तालमेल गरेर विभिन्न क्याम्पसमा उम्मेदवारी दर्ता गरिएका छन् । 

सानोठिमी बहुमुखी, जनप्रशासन क्याम्पसमा नेविसंघ र अखिल क्रान्तिकारीबीच तालमेल छ भने त्रिचन्द्र क्याम्पसमा नेविसंघविरुद्ध अनेरास्ववियु, अखिल क्रान्तिकारीबीच गठबन्धन बनेको छ । गोरखा क्याम्पसमा अखिल क्रान्तिकारीविरुद्ध नेविसंघ र अनेरास्ववियुले चुनावी मोर्चा कसेका छन् । २०७९ मा स्ववियु निर्वाचन हुन नसकेका पोखराका पृथ्वीनारायण र पश्चिमाञ्चल क्याम्पस, वीरगन्जको ठाकुरराम, काठमाडौंका रत्नराज्यलक्ष्मी, त्रिचन्द्र, नेपाल कमर्सलगायत क्याम्पस यस पटक चुनावको अन्तिम तयारीमा छन् ।