काठमाडौँ — न्यायालयमा मुद्दा फर्स्योटको दर आर्थिक वर्ष २०८०/८१ मा ११.३६ प्रतिशतले बढेर ५८.२४ प्रतिशत पुगेको छ । सर्वोच्च र मातहतका अदालत तथा न्यायाधिकरणमा नयाँ र पुराना गरी ३ लाख ८८ हजार ३ सय ५७ मुद्दा रहेकामा २ लाख २६ हजार १ सय ८५ मुद्दा फर्स्योट गरिएका हुन् । 

प्रधानन्यायाधीश प्रकाशमानसिंह राउतले राष्ट्रपति रामचन्द्र पौडेललाई बुझाएको सर्वोच्च अदालतको वार्षिक प्रतिवेदनअनुसार आर्थिक वर्ष २०८०/८१ मा सबै तहका न्यायालयमा २ लाख २७ हजार ९ सय ६२ मुद्दा दायर भएका थिए । त्यसअघि अदालतमा छिनोफानो हुन बाँकी मुद्दा, रिट र निवेदन/प्रतिवेदनको संख्या १ लाख ६० हजार ३ सय ९५ थियो । तीमध्ये १ लाख ६२ हजार १ सय ७२ मुद्दा छिनोफानो नभएर चालु आर्थिक वर्षका लागि सरेका छन् । 

सर्वोच्च अदालतमा आर्थिक वर्ष २०८०/८१ मा १२ हजार ८ सय १७ नयाँ मुद्दा परेका थिए भने २८ हजार ४ सय ३२ छिन्न बाँकी पुराना मुद्दा थिए । नयाँ र पुराना गरी ४१ हजार २ सय ४९ मुद्दामध्ये १५ हजार ५ सय २१ मुद्दा छिनोफानो भएका छन् । सर्वोच्चले ३७.३७ प्रतिशत मुद्दा फर्स्योट गरेको हो । यो अघिल्लो वर्षको तुलनामा २१.६४ प्रतिशतले बढी रहेको सर्वोच्चले जनाएको छ ।

सर्वोच्चको मुद्दा फर्स्योट दर आर्थिक वर्ष २०७८/७९ मा १८ र २०७७/७८ मा १४ प्रतिशत हाराहारी थियो । सर्वोच्चमा पाँच वर्ष वा त्योभन्दा पुराना मुद्दा १५ हजार १ सय ४६ थान थिए । त्यस्ता पुराना ११ हजार ९ सय ७७ मुद्दा अर्को वर्षका लागि सरेका छन् । 

मुलुकभरका १८ वटै उच्च अदालतमा २०८०/८१ मा ५५ हजार ८ सय ७२ वटा नयाँ मुद्दा परेका थिए भने अघिल्लो वर्षबाट छिन्न बाँकी रहेर सरेका मुद्दाको संख्या २५ हजार ३ सय ६७ थियो । तीमध्ये ५६ हजार १४ मुद्दा उच्च अदालतले छिनोफानो गरेको छ, जुन ६८.९५ प्रतिशत फर्स्योट दर हो । उच्चको फर्स्योट दर अघिल्लो तुलनामा ७.१० प्रतिशतले बढेको हो । 

७७ वटै जिल्ला अदालतमा १ लाख ५७ हजार ४ थान नयाँ र १ लाख ४ हजार ६ सय ६८ थान पुराना मुद्दा रहेकामा ५७.९५ प्रतिशत फर्स्योट गरिएका छन् । यो गत वर्षको तुलनामा १२ प्रतिशतले बढी हो । जिल्ला अदालतमा छिन्न बाँकी रहेर चालु वर्षमा सरेका मुद्दाको संख्या १ लाख १० हजार २६ छ ।