काठमाडौँ — सहकारीमा बचतकर्ताको रकम फिर्ता गर्नका लागि विधेयक ल्याइएको भूमि व्यवस्था, सहकारी तथा गरिबी निवारणमन्त्री बलराम अधिकारीले बताएका छन् ।

अध्यादेश प्रतिस्थापन विधेयकमाथि सांसदले उठाएका प्रश्नको जवाफ दिने क्रममा मन्त्री अधिकारीले सहकारी क्षेत्रमा देखिएका विकृति र अनियमितताको निराकरणका लागि कानुन बनाउन खोजिएको बताए । 

प्रतिनिधिसभाको बुधबारको बैठकमा सांसदहरूले विधेयकमाथि विरोधको सूचना राख्ने क्रममा उठाएका प्रश्नको जवाफ दिँदै मन्त्री अधिकारीले प्रचलित कानुनमा आवश्यक संशोधन गरी सहकारी बचतकर्ताको बचत फिर्ता गर्ने व्यवस्था गर्न लागिएको बताए ।

‘सहकारीको क्षेत्रमा देखिएका विकृति र अनियमितताको निराकरण गर्न, प्रचलित कानुनमा आवश्यक संशोधन गरी बचतकर्ताको बचत फिर्ता गर्न र बचत सुरक्षा गर्न, नियमन प्राधिकरणको व्यवस्थालाई व्यवस्थित गरी गलत गर्नेलाई कारबाही गर्न, तीन तहको सरकारमा समन्वय गरी सहकारीलाई अझै व्यवस्थित गर्न विधेयक ल्याइएको हो,' मन्त्री अधिकारीले भने, 'सबै वर्ग र तहको प्रतिनिधित्व गर्न यो विधेयक ल्याइएको छ । आईसीएले तोकेका विधिअनुरुप नै विधेयक आएको कारण विरोधका सूचनाहरु फिर्ता लिन अनुरोध गर्दछु ।’