काठमाडौँ — प्रेस काउन्सिलले कालोसूचीमा राखेपछि अंग्रेजी दैनिक ‘द हिमालयन टाइम्स’ ले आपत्ति जनाएको छ । आफ्नो जवाफ र स्पष्टीकरणबारे सुनुवाइ नगरी काउन्सिलले कालोसूचीमा राखेकाले उक्त त्रुटिपूर्ण निर्णय सच्याउन पत्रिकाले आग्रह गरेको छ । 

हिमालयन एडभेन्चर्स र निर्मल पुर्जाको विषयमा सम्प्रेषण भएको समाचारलाई लिएर गत १४ जेठमा उजुरी दर्ता भएपछि काउन्सिलले पत्रिकासँग जवाफ मागेको थियो ।

पत्रिकाले आफ्नो भनाइसहित खण्डन प्रकाशन गरेकामा उजुरीकर्ताले काउन्सिलमा अर्को निवेदन दिएका थिए । त्यस्तै, गत २७ भदौमा अर्को पटक स्पष्टीकरण सोधिएकामा पत्रिकाले उजुरीकर्ताको खण्डन प्रकाशन गरेको थियो ।  तर पत्रिकाले समाचारसँग सम्बन्धित अन्य विवरण पनि लेखेकामा काउन्सिलले कारबाहीको विषय बनाएको छ ।

‘उजुरीकर्ताको प्रतिक्रियालाई आंशिक स्थान दिएको देखिए पनि यसमा गिलमोरको भनाइ उद्धृत गर्दै उजुरीकर्ताको खण्डनको प्रतिखण्डन भएको देखियो,’ काउन्सिलको पत्रमा भनिएको छ । पत्रिकाले समाचारसँग सम्बन्धित अन्य व्यक्तिको भनाइलाई पनि उल्लेख गर्न पाउने अभ्यास र अधिकारलाई काउन्सिलले कारबाहीको विषय बनाएको छ । जवाफ चित्तबुझ्दो नआएको भन्दै काउन्सिलले द हिमालयन टाइम्स दैनिक र हिमालयन टाइम्स डटकमलाई कालोसूचीमा राखेको हो ।