पोखरा — म्याग्दीको बेनीस्थित कस्तुरी सहकारी संस्थाको एक साताअघि हुने भनिएको साधारण सभा एकाएक रोकिएको छ । उक्त सहकारीमा जम्मा भएको ५२ करोड रुपैयाँ बचतमध्ये संचालक समितिका अध्यक्ष राजेश शाक्य एक्लैको परिवारले ४८ करोड रुपैयाँ हिनामिना गरेको तथ्य सार्वजनिक भएको थियो । 

२०६६ सालमा स्थापित उक्त सहकारीमा त्यसयता शाक्य नै निरन्तर अध्यक्ष छन् । उनकै परिवारले सहकारीमा बचत भएको ५२ मध्ये ४८ करोड रुपैयाँ हिनामिना गरेको तथ्य छानविन समितिको प्रतिवेदनले बाहिर ल्याएको थियो ।

कस्तुरी सहकारीका व्यवस्थापक लोकबहादुर पुन (लोकेश) बेनीकै अर्को कुमारी सहकारीको रकम हिनामिनाको अभियोगमा पुर्पक्षका लागि अदालतको आदेश अनुसार थुनामा छन् । जसकारण गत शुक्रबार तय भएको साधारणसभा हुन नसकेको हो । दुवै सहकारीको व्यवस्थापक रहेका लोकबहादुर पुर्पक्षका लागि कारागार चलान भएका छन् ।