सहसचिवको दरबन्दीमा उपसचिव सीडीओ रहेका जिल्लामा खटाउने योजनाका साथ अन्य मन्त्रालयअन्तर्गत रहेका सहसचिवलाई गृह मन्त्रालयमा सरुवा
काठमाडौँ — सहसचिव दरबन्दीका प्रमुख जिल्ला अधिकारी (सीडीओ) मा उपसचिव खटाउने प्रवृत्ति रोक्न गृह मन्त्रालयले तयारी अघि बढाएको छ । सहसचिवको दरबन्दी भए पनि अहिले १० जिल्लामा उपसचिव सीडीओको जिम्मेवारीमा छन् । उनीहरूका ठाउँमा पठाउन सरकारले सहसचिवहरूलाई गृहमा सरुवा गरिसकेको छ ।
७७ मध्ये ६१ जिल्लामा सहसचिव सीडीओ रहने गरी दरबन्दी व्यवस्था गरिएको छ । तर दुर्गम जिल्लामा सीडीओ बनेर जान सहसचिव नमान्ने भएका कारण सरकारले उपसचिव पठाउने गरेको छ । राजनीतिक पहुँच र व्यक्तिगत सम्बन्धका आधारमा पनि उपसचिवलाई सीडीओ बनाएर पठाउने प्रवृत्ति छ ।
सहसचिवको दरबन्दी रहेको जिल्लामा उपसचिवलाई सीडीओ बनाइएको भन्दै सरकारको आलोचना हुने गरेको छ । यसपटक भने उपसचिव पठाउने प्रवृत्ति अन्त्य गर्ने तयारी भइरहेको गृह मन्त्रालयका एक अधिकारीले बताए ।
सरकारले गत सोमबार संघीय मामिला तथा सामान्य प्रशासन मन्त्रालय, प्रदेशलगायत विभिन्न स्थानमा कार्यरतसहित १७ सहसचिवलाई गृह मन्त्रालय सुरुवा गरेको थियो । गत माघ २६ मा बढुवाको नियुक्ति पाएका प्रशासन सेवाका ४८ सहसचिवमध्येबाट पनि केहीलाई गृह पठाइएको छ । सीडीओ हुने आकांक्षा बोकेका केही सहसचिवले भने राजनीतिक पहुँच प्रयोग गरेर गृहमा सरुवा मिलाएको स्रोतले जनाएको छ ।
सरकारले गृहमा रहेका दुई सहसचिवलाई भने अन्यत्र सरुवा गरेको छ । गृहमा सरुवा गरिएकै मध्येबाट विभिन्न जिल्लामा सीडीओ बनाउने सरकारको योजना छ । ‘यसअघि वरिष्ठ सहसचिव विकट र सानो जिल्ला जान नचाहेका कारण समस्या भएको थियो । यसपालि भर्खर सहसचिवमा बढुवा भएकाहरूले जिल्ला नजाने
भन्दैनन् भन्ने विश्वास छ,’ गृहका एक अधिकारीले भने । गृहका प्रवक्ता तथा सहसचिव रामचन्द्र तिवारीले सहसचिवहरूको आन्तरिक व्यवस्थापनको काम भइरहेको जानकारी दिए ।
सरुवा भएका एक सहसचिवले सबैका लागि सीडीओको दरबन्दी नपुग्ने बताए । ‘संघीय मन्त्रालयले गृहको काम हो, जे जे गरे पनि गरुन् भन्ने मनस्थितिले सरुवा गरेको देखिन्छ,’ उनले भने । गृहमा अहिले विभिन्न कारणले तीन सहसचिव अतिरिक्त समूहमा छन् । भर्खरै सरुवा गरिएकामध्ये १० जनालाई सीडीओ बनाइए अरू ‘बरन्डा’ मै रहनुपर्ने अवस्था छ ।
‘कतिपय उपसचिव राजनीतिक शक्तिको आडमा सीडीओबाट फिर्ता नहोलान्,’ गृह स्रोतले भन्यो, ‘आफूले रोजेको स्थान नपाए नजाने सहसचिव पनि हुन्छन् । उनीहरूलाई मन्त्रालयले केही गर्न सक्दैन ।’
संघीय मामिला मन्त्रालयका प्रवक्ता तथा सहसचिव कालीप्रसाद पराजुलीले भने गृहमा भएको दरबन्दीअनुसार नै सहसचिवको सरुवा भएको बताए । डोटी, डडेलधुरा, बैतडी, दैलेख, रामेछाप, अर्घाखाँची, सल्यान, प्यूठान, जुम्लालगायत जिल्लामा दरबन्दी सहसचिवको भए पनि सीडीओ उपसचिव छन् । संघीय मन्त्रालय कर्मचारी प्रशासन महाशाखाका एक उपसचिवले भने, ‘बढुवा लिन मात्र राज्यलाई भार पर्ने गरी सहसचिवको दरबन्दी बढाउनु गलत हो ।’
