अर्का सहभागीले प्रदेश बलियो हुनुपर्नेमा किन यति धेरै आक्रमण भइरहेको भनेर प्रश्न राखे । 

यसको जवाफ दिँदै थापाले प्रदेशलाई 'स्केप गोट' (बलिको बोको) बनाउन खोजेको बताए । ‘हामीले संघले प्रदेशलाई दिनुपर्ने अधिकार केही नदिई संघीयताको सही अभ्यास नगरी फेरि एउटा 'स्केप गोट' प्रदेशलाई बनाउन खोजिरहेका छौं,’ थापाले भने ।

अर्की वक्ता टिच फर नेपाल फेलोसिपकी सहसंस्थापक एवं प्रमुख कार्यकारी अधिकृत स्वस्तिका श्रेष्ठले निराशाकै बीच आशा रहेको बताइन् । ‘चुनौती छैन भन्न खोजेको पनि होइन फेरि आशा भनेको एकदमै अन्धो आशा भन्न खोजेको पनि होइन । समुदायमा आशा पनि छ निराशा पनि,’ उनले भनिन् ।

राजनीतिशास्त्रमा विद्यावारिधि गरेका सोसल साइन्स बहाःका सहनिर्देशक जीवन बानियाँले नेपाल मात्र निराशा रहेको देश नभएको सुनाए । तर, निराशाको विन्दु र तत्वहरु मुख्य रहेको उनको भनाइ थियो । ‘नेपाल मात्र त्यस्तो देश होइन जहाँ निराशा छ । निराशाको रेट कति छ ? कारक तत्व के हो ? भन्ने कुरामा चाहिँ फरक हुन सक्छ । नेपालको सन्दर्भमा रोजगारी, राजनीति नै रहेको विभिन्न अध्ययनले पनि देखाइरहेको छ,’ बानियाँले भने ।