०००

राष्ट्रिय सभा सदस्य वामदेव गौतमले पुनः राजा बन्ने चाहना परित्याग गरेर प्रजातान्त्रिक राजनीतिक गरी प्रधानमन्त्री बन्न पूर्वराजा ज्ञानेन्द्र शाहलाई सुझाव दिएका छन् । आइतबार राष्ट्रिय सभाको बैठकमा गौतमले आफ्नो नेतृत्वमा एउटा प्रजातान्त्रिक राजनीतिक पार्टी खोलेर निर्वाचन आयोगमा दर्ता गरेर २०८४ मा हुने निर्वाचनमा भाग लिन शाहलाई सुझाव दिएका हुन् ।

०००

अमेरिकी अर्बपति इलन मस्क नेतृत्वको सरकारी दक्षता विभाग 'डज'ले अमेरिकाका सरकारी कर्मचारीलाई एक साताभित्र आफुले गरेका उपलब्धि सूचीवद्ध गर्न वा राजीनामा दिन आग्रह गरेका छन् । सरकारी कर्मचारीहरूलाई शनिबार पठाइएको एक इमेलमा उनीहरूलाई गत साताका उपलब्धिबारे विस्तृत जानकारी गराउन वा राजीनामा दिन आग्रह गरिएको हो । यो डोनाल्ड ट्रम्प प्रशासनले संघीय कर्मचारीलाई लक्ष्य गरी चालेको पछिल्लो कदम हो । 

०००

लेबनानले फोर नेसन्स कपको आफ्नो अन्तिम खेलमा आइतबार किर्गिस्तानलाई २-० ले पराजित गरेको छ । दुवै टिम यसअघि नै प्रतियोगिताको फाइनल पुग्ने समीकरणबाट बाहिरिसकेको स्थितिमा लेबनानका लागि यो सान्त्वना जित रह्यो । दुवै टिम आ-आफ्नो सुरुआती दुई खेलमा पराजित रहेको थियो । जितसँगै प्रतियोगिता टुंग्याएको लेबनान चार टिम सम्मिलित प्रतियोगिताको तेस्रो स्थानमा रह्यो । उसको तीन अंक भएको छ ।