आचार्य भने आफैं बस्न चाहेकाले केही समय अस्पतालनै राखिने कार्कीले बताए । 'मेयरज्यूले मुटुसम्बन्धी पहिलेदेखि नै औषधि खानुहुँदो रहेछ। उहाँले केही समय बस्ने इच्छा राख्नु भयो,' कार्कीले भने।  

पोखरा भ्रमण वर्षको कार्यक्रम उद्घाटनका क्रममा शनिबार बेलुनको झुप्पा पड्किँदा मेयर आचार्यको गालाको धेरै भाग र देब्रे हातमा गहिरो जलन भएको थियो भने मन्त्री पौडेलको दुवै हातमा र अनुहारमा जलन भएको थियो । उनीहरूलाई पोखरामै प्रारम्भिक उपचार गरेर सोही दिन हेलिकोप्टरबाट काठमाडौंस्थित कीर्तिपुर अस्पताल ल्याइएको थियो ।

आयोजकले बेलुनमा हिलियम ग्यास भर्नुपर्नेमा हाइड्रोजन भरिएकोले यो दुर्घटना भएको बताएको छ। उद्‍घाटनमा मन्त्री आफैंले बालेको झिर्झिरे क्यान्डलको झिल्काले भेटेर बेलुन पड्किएको थियो । 

घटनाको सत्यतथ्य जाँचबुझ गर्न गृह मन्त्रालयले कास्कीका प्रमुख जिल्ला अधिकारी भरतमणि पाण्डेको नेतृत्वमा आइतबार ८ सदस्यीय छानबिन समिति पनि गठन गरिसकेको छ। पोखराको घटनापछि सार्वजनिक कार्यक्रमको सुरक्षा मापदण्डका विषयमा पनि प्रश्न उठेका छन् ।