काठमाडौँ — भौतिक पूर्वाधार तथा यातायात मन्त्री देवेन्द्र दाहालले बाढीले क्षति पुगेको बीपी राजमार्ग बनाउन स्रोतको अभाव हुन नदिने बताएका छन् । शनिबार राजमार्ग निरीक्षण गर्दै स्रोत अभाव हुन नदिने प्रतिबद्धता जनाउँदै क्षतिग्रस्त खण्डमा तुरुन्त पुनःनिर्माणको काम सुरु गर्न पनि उनले निर्देशन दिएका हुन् ।
बर्खायाममा यातायात अवरुद्ध हुन नदिने गरी काम सुरू गर्न उनले सडक विभागको ध्यानाकर्षण गराएका छन् । उक्त राजमार्ग देशको पूर्वी तराईलाई संघीय राजधानीसँग जोड्ने लाइफलाइन रहेकाले एक दिन पनि अवरुद्ध हुन नदिने गरी काम अघि बढाउन सडक विभागलाई निर्देशन दिएकाे उनले बताए । मन्त्रीसँगै बीपी राजमार्गको अनुगमन गर्न पुगेका मन्त्रालयका सचिव केशवकुमार शर्माले विभागको जनशक्ति र उपकरणसमेत तत्काल परिचालन गरेर काम सुरु गर्न सडक विभागलाई आग्रह गरे ।
यस्तै सडक विभागका महानिर्देशक रामहरि पोखरेलले अल्पकालीन र दीर्घकालीन तयारीसहित मर्मत र पुनःनिर्माणको काम थालिने बताए । संघीय सडक सुपरिवेक्षण तथा अनुगमन कार्यालय काठमाडौंका प्रमुख शुभराज न्यौपानेले नियमित रूपमा सडकको अवरोध हटाउने तथा तत्काल गर्नुपर्ने मर्मतको काम भइरहेको बताए ।
काभ्रे भन्ज्याङ–नेपाल थोक खण्डको १२ किलोमिटर सडकमा गत असोज १० देखि १२ सम्म आएको बाढीपहिरोले क्षति गरेको छ । यसको ८.७ किमि सडक खण्ड रोशी खोलाले बगाएको छ । निर्माणका लागि अध्ययनको काम सकिएर बजेट अभावले थप प्रक्रिया अघि बढ्न सकेको छैन । अध्ययनअनुसार ९ अर्ब ६६ करोड रुपैयाँ लाग्ने देखिएको छ । यो सडक खण्ड भएर दैनिक ३ हजार बढी सवारीसाधन गुड्छन् । चाडबाडको बेला ७ देखि १० हजार हाराहारी सवारीसाधन ओहोरदोहोर गर्छन् ।
बजेट व्यवस्थापन भएपछि तीन वर्षभित्र निर्माण सक्ने गरी ठेक्का गर्ने योजनामा सडक विभाग छ । काभ्रेको चौकीडाँडादेखि मुल्कोटसम्मको सडकमा समस्या छ । त्यसमा पनि बढी समस्या चौकीडाँडादेखि नेपाल थोक खण्डमा छ । बाढीले सिन्धुली खण्डमा कम र काभ्रे खण्डमा बढी क्षति पुर्याएको छ ।
त्यस्तै मन्त्री दाहालसहितको टोलीले शनिबार नै सूर्यविनायक–धुलिखेल सडकको समेत निरीक्षण गरी कामलाई तीव्रता दिन निर्देशन दिएको छ । त्यस क्रममा आयोजना प्रमुख राजेन्द्र दासले निर्माणलाई गति दिन नियमित अनुगमन र निगरानी भइरहेको बताए ।
