दाङ — पूर्वप्रधानमन्त्री एवं नेपाली कांग्रेसका सभापति शेरबहादुर देउवाले थारु समुदाय कला र संस्कृतिले धनी रहेको बताएका छन् ।दंगीशरण गाउँपालिका–३ चखौरास्थित थारु संग्रहालय परिसरमा शनिबारदेखि सुरु भएको अन्तर प्रदेशस्तरीय थारु सांस्कृतिक तथा रैथाने खाना महोत्सव उद‍्घाटन गर्दै उनले यस्तो धारणा व्यक्त गरेका हुन् ।

'थारु समुदाय कला र संस्कृतिले धनी छ । यो थारु समुदायको सम्पत्ति हो,' उनले भने, 'थारु समुदाय, शिक्षा र ज्ञानका क्षेत्रमा अझै पनि पछाडि परेको देखिन्छ । कला संस्कृतिसँगै त्यसमा पनि सुधार गर्नुपर्छ ।' आत्मनिर्भर हुँदै आफ्नो संस्कृति बचाउने कुरामा पनि ध्यान दिनुपर्नेमा उनले जोड दिए ।

थारु सांस्कृतिक महोत्सवले पनि थारु कला र संस्कृति बचाउन महत्त्वपूर्ण भूमिका खेल्ने उनले बताए । 'थारु समुदाय आफ्नो संस्कार बचाउन एकजुट भएकामा मलाई खुसी लागेको छ,' उनले भने, 'यसैगरी आफ्नो समुदायमा एकता र मेलमिलाप कायम गर्नुपर्छ ।'