काठमाडौँ — राजधानीको ठमेलमा बिहीबार राति ड्युटीमा रहेका दुई जना प्रहरीमाथि हातपात भएको छ । हातपात गर्नेहरु प्रमुख सत्तारुढ दल नेकपा एमाले निकट अनेरास्ववियुका नेताहरु रहेको प्रहरीले जनाएको छ ।
प्रहरी वृत्त दरबारमार्गबाट मोटरसाइकलमा ड्युटीमा खटिएका प्रहरी हवल्दार रघुलाल घर्ती र प्रहरी जवान नगेन्द्र विष्टमाथि हातपात भएको दरबारमार्ग प्रहरीले जनाएको छ । प्रहरीले हातपात गर्नेहरुको पहिचान गरिसकेको छ ।
हातपात गर्नेहरुमा अनेरास्ववियुका स्थायी कमिटी सदस्य कमल जोशी, रमेश फुलारा, गणेश शाही, दिनेश सिग्देल, गोपालजंग शाहीसहित ६ जना रहेको प्रहरीले जनाएको छ ।
ठमेलस्थित अमृत साइन्स क्याम्पस अस्कलमा प्रहरीमाथि हातपात भएको हो । मोटरसाइकलमा ड्युटीमा गएका प्रहरीले मापसे गरेर होहल्ला गर्दै हिँडेका विद्यार्थी नेताहरुलाई सम्झाउन खोज्दा उल्टै आक्रमण गरेको प्रहरीले जनाएको छ ।
जिल्ला प्रहरी परिसर काठमाडौंका प्रवक्ता प्रहरी उपरीक्षक अपीलराज बोहोराका अनुसार उक्त घटनाको सिसिटिभी फुटेज मगाएर अनुसन्धान सुरु गरिएको छ । आक्रमण गर्नेहरुको खोजी भइरहेको प्रहरीले जनाएको छ । प्रहरीमाथि आक्रमण गरिसकेपछि उनीहरु अस्कल क्याम्पसको होस्टेलभित्र छिरेका थिए ।
