काठमाडौँ — माओवादी अध्यक्ष पुष्पकमल दाहालले सरकारका कामले गति नलिँदा सर्वसाधारणमा निराशा बढेको बताएका छन् । मुलुकको आर्थिक अवस्था सुधार गर्न नसकेको टिप्पणी गर्दै उनले भ्रष्टाचार छानबिन अवरुद्ध गरेको आरोप सरकारमाथि लगाएका छन् ।

प्रतिनिधिसभाको बैठकलाई बिहीबार सम्बोधन गर्दै उनले सरकार अध्यादेशको बाटोमा अघि बढ्न खोजेको र विपक्षी दलहरूमाथि राजनीतिक प्रतिशोध लिएको आरोप लगाए । प्रधानमन्त्री केपी शर्मा ओली आफैं ‘सरकार ढल्दै छ’ भनेर कमजोर मनोविज्ञानका साथ अघि बढेको उनको टिप्पणी थियो । संविधान संशोधन गरी मुलुकमा दुई दलीय व्यवस्थाको कल्पना नगर्न उनले चेतावनी दिए ।

दाहालले जनताप्रति सरकार हदैसम्म गैरजिम्मेवार बनेको र अहंकारपूर्ण ढंगले गलत बाटोतिर गइरहेको आरोप लगाए । सरकार बिचौलिया र स्वार्थ समूहको पक्षमा लाग्दा मुलुक आक्रोशित बनेको उनको भनाइ थियो । दाहालले संविधानमा समानुपातिक प्रतिनिधित्व प्रणाली र समावेशितालाई संशोधन गर्न चुनौती दिए । 

‘प्रधानमन्त्री ओलीजीले पार्टीकै औपचारिक कार्यक्रममा दोहोर्‍याइतेर्‍याइ संविधान संशोधन ०८७ मा हुन्छ भनेको सुनेँ । आज म विशेषगरी कांग्रेसका साथीहरूलाई सोध्न चाहन्छु, अब म संविधान संशोधनबारे बोलुँ कि नबोलुँ ?’ उनले भने, ‘संशोधन नै गर्ने हो भने महिलालाई ५० प्रतिशत, जनसंख्या र विशेषाधिकारका आधारमा दलितलगायतको प्रतिनिधित्व हुने गरी पूर्ण समानुपातिक निर्वाचन प्रणालीमा जाऔं । प्रत्यक्ष निर्वाचित कार्यकारी प्रणालीमा जाऔं । यसमा छलफल गर्न तपाईंहरू तयार हुनुहुन्छ ?’

दाहालले दुई छिमेकीसँग सम्बन्ध बिग्रिएको तर्क गरे । ‘अहिलेको सरकारले नेपालको हितअनुरूप कूटनीतिक क्षेत्रमा भूमिका खेल्न सकेन,’ उनको दाबी छ, ‘राष्ट्रिय स्वार्थका आधारमा विश्वमञ्चमा नेपालको दरिलो उपस्थिति बनाउनुको साटो सरकारले आफ्नो स्वार्थमा परराष्ट्र सम्बन्ध ध्वस्त बनायो ।’ हमासले गाजामा बन्दी बनाएका विपिन जोशीको रिहाइका लागि सरकारले पहल गर्न नसकेको पनि उनले उल्लेख गरे ।