ताप्लेजुङ — गृह मन्त्रालयले गठन गरेको वार्ता समितिसँग छलफलका लागि ‘नो केबलकार समूह’ ले चार सदस्यीय वार्ता सहजीकरण समिति गठन गरेको छ । अमर तुम्याहाङको संयोजकत्वमा राम मादेन, शंकर लिम्बू र सरु सिंघक सदस्य रहेको समिति गठन गरेको हो । योसँगै गत माघ १२ गतेदेखि सुरु भएको द्वन्द्व व्यवस्थापनका लागि वार्ता प्रक्रिया सुरु हुने भएको छ । 

केबलकार खारेजी संयुक्त संघर्ष समितिका संयोजक खगेन्द्र फेम्बू लिम्बूले यो समितिबाट वार्ताका लागि समन्वयको वातावरण बन्ने वताए । उनले भने, 'संघीय सरकारकै तर्फबाट मात्रै कुरा गर्छौं भन्ने हाम्रो अडान थियो, त्यो सकारात्मक छ । तर सहसचिवको तहबाट निर्णय भएर कार्यान्वय हुन सक्दैन । त्यसैले हामीले पोलिटिकल लेभलको वार्ता समिति बन्नुपर्छ पनि भनेका छौं । त्यो विषयमा छलफल गर्न सहजीकरण समिति बनाइएको हो ।’