काठमाडौँ — प्रमुख प्रतिपक्षी माओवादी केन्द्र र प्रतिपक्षी राष्ट्रिय स्वतन्त्र पार्टीले संसदीय समितिमा विधेयक विचाराधीन रहेको अवस्थामा सरकारले अध्यादेश ल्याएको विषयमा सभामुख देवराज घिमिरेको ध्यानाकर्षण गराएका छन् ।

सभामुखले आइतबार प्रतिपक्षी दलका प्रमुख सचेतकहरूलाई छलफलमा बोलाएका थिए । उक्त छलफलमा विधेयक विचाराधीन रहेको अवस्थामा अध्यादेश आएको विषय उठेको हो । 

सरकारले संसद्लाई बेवास्ता गरिरहेको प्रसंग उल्लेख गर्दै प्रतिपक्षी दलहरूले सभामुखलाई ध्यानाकर्षण गराएका हुन् । 'हामीले अध्यादेशका बारेमा कुरा राख्यौं । सरकारले संसद्लाई राम्रोसँग रेस्पोन्स गरिरहेको छैन । किनभने अर्थसम्बन्धी एउटा विधेयक संसद्को अर्थ समितिमा छलफलकै क्रममा छ । तर त्यसबारे अध्यादेश आएको छ । यो मिलेन भनेर भन्यौं,' माओवादीका प्रमुख सचेतक हितराज पाण्डेले भने, 'त्यसका कन्टेन्टमा त अझै हामीले कुरा गरेकै छैनौं । हामीले अध्यादेशको बारेमा संसद्‌मै कुरा राख्ने र सरकारको यो कदम ठीक नभएको कुरा राख्यौं ।’ 

प्रतिनिधिसभाको अर्थ समितिमा दफावार छलफलमा रहेको आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१ लाई फिर्ता लिने पक्रिया पूरा नहुँदै सरकारले अध्यादेश ल्याएको थियो । सरकारले 'आर्थिक कार्यविधि तथा वित्तीय उत्तरदायित्व (पहिलो संसोधन) अध्यादेश, २०८१' ल्याएको थियो । यसरी सरकारले संसद्लाई बेवास्ता गरिरहेको प्रतिपक्षी दलहरूको भनाइ थियो ।