सिरहा — जनता समाजवादी पार्टी, नेपालका अध्यक्ष एवं पूर्वउपप्रधानमन्त्री उपेन्द्र यादवले मधेशको इतिहास नेपालको इतिहासभन्दा हजारौं वर्ष पुरानो रहेको बताएका छन् । 

सिरहा सदरमुकाममा शनिबार बलिदानी दिवसको अवसरमा आयोजित सभालाई सम्बोधन गर्दै उनले यस्तो बताएका हुन् । नेपाल नेपाली भाषीहरूको देश मात्रै रहेको भाष्य बनाइएको भन्दै यसलाई मधेश आन्दोलनले हदसम्म चिरेको यादवको भनाइ छ । 'नेपाल भनेको नेपाली भाषीहरूको देश मात्रै हो भन्ने भाष्य बनाइएको थियो, देशमा मात्रै होइन, विदेशमा पनि,' उनले भने, 'जबकि मधेशको इतिहास नेपालको इतिहासभन्दा हजारौं वर्ष पुरानो छ ।'

मधेशको संस्कृति र सभ्यता उत्सर्गमा हुँदा नेपाल र नेपाली शब्दको नामोनिशानसमेत नभएको दाबी उनको छ । गोर्खा साम्राज्यवादीहरूले एकल बर्चस्व हुने गरी मधेशलाई कब्जा गरेर देशको नामकरण गरेको यादवको भनाइ छ ।

मधेश आन्दोलनले उनीहरूको यो अत्याचारमाथि दह्रो रूपमा प्रहार गरे पनि अझै सशक्त संघर्षको आवश्यकता रहेको यादवले बताए । 'यो मुलुकमा थुप्रै राष्ट्रियता छ, सयौं जात र समुदाय छन्,' उनले भने, 'यो मुलुक यहाँ बसोबास गर्ने सबै जातजाति र भाषाभाषीहरूको साझा मुलुक नबनेसम्म संघर्ष गरिरहन आवश्यक छ ।'