लमजुङ — सरकारका प्रवक्ता एवम् सञ्चार तथा सूचना प्रविधिमन्त्री पृथ्वीसुब्बा गुरुङले नेपालको अर्थतन्त्र समस्यामा रहेको बताएका छन् । उनले अर्थतन्त्र सुधार्न सरकार अध्यादेश ल्याउन बाध्य भएको दाबी गरे । 

लमजुङको मर्स्याङ्दी गाउँपालिका-२, घनपोखरा मोर्ङीस्थित त्रिभुवन माविको ५८ औं वार्षिकोत्सव तथा अभिभावक दिवस कार्यक्रमलाई आइतबार सम्बोधन गर्दै उनले अर्थतन्त्रको अवस्था सहज नरहेको बताए ।

‘साँच्चिकै अर्थतन्त्र समस्यामा छ । म अर्थमन्त्रीसँग नजिक बसेर कुरा गरिरहेको छु । अर्थतन्त्र सुधार्ने प्रयास गरिए पनि सुध्रिएको छैन,’ उनले भने । उनले कहींकतै रोजगारी सिर्जना नभएको, विदेशबाट निर्यात सामग्री ल्याउने परिस्थिति नबनेको, विदेशी मुद्राको सञ्चितिले ढुकुटी भरिए पनि विदेशबाट निर्यात सामग्री नआउने अवस्थामा खर्च हुन नसकेको बताए ।

‘बैंकमा पैसा छ, ऋण लिन कोही जाँदैन । उद्योग चल्न सकेको छैन । यो परिस्थितिको अन्त्य गर्नुपर्ने छ । सबै समस्याको समाधान गर्नुपर्नेछ । त्यसैले अध्यादेश ल्याउन बाध्य भएका हौं,’ उनले भने ।