धनगढी — स्वास्थ्य तथा जनसंख्यामन्त्री प्रदीप पौडेलले गेटामा स्वास्थ्य विज्ञान विश्वविद्यालय तत्काल सञ्चालन हुन कठिन हुने बताएका छन् । आर्थिक स्रोत र मानव संशाधनलगायतका कुराले विश्वविद्यालय स्थापना गर्न कठिन हुने स्वास्थ्यमन्त्री पौडेलको भनाइ छ । 

‘विधेयक बन्दैमा गेटामा विश्वविद्यालय सञ्चालन हुन सक्दैन,’ मन्त्री पौडेलले भने ‘विश्वविद्यालय निर्माणको कुरामा कसैको असहमति छैन । तर विश्वविद्यालय बन्न आफ्नै प्रक्रिया छन् । लागत अत्यधिक छ । आर्थिक स्रोत, मानव संशाधनलगायत पूर्वाधार आवश्यक हुन्छ । समय लाग्छ ।’ 

अस्पताल नै सञ्चालन नभएको, मेडिकल पढाइ पनि नभएको अवस्थामा विश्वविद्यालय बन्न कठिन हुने बताउँदै मन्त्री पौडेलले तत्काल अस्पताल सञ्चालन गर्ने र एमबीबीएस पढाइ सञ्चालन गर्नेतर्फ जानुपर्ने बताए ।   सरकारले ०८० माघ २९ गते कैलालीको गेटामा सहिद दशरथन्द स्वास्थ्य विज्ञान विश्वविद्यालय स्थापना गर्ने निर्णय गरेको थियो । सोही निर्णयका आधारमा विश्वविद्यालय स्थापना गर्ने विधेयक राष्ट्रिय सभाबाट पारित भएर हाल प्रतिनिधिसभामा विचाराधीन रहेको छ । 

स्वास्थ्य तथा जनसंख्या मन्त्री पौडेलले गेटामा विश्वविद्यालय स्थापनाको प्रक्रिया लामो हुने र लागत पनि अत्यधिक हुने भएकाले तत्काल विशिष्टिकृत स्वास्थ्य सेवा उपलब्ध गर्ने गराउनेतर्फ आफ्नो जोड रहेको बताए । ‘असारसम्म एक सय बेडको त जसरी पनि बनाउछौं । सकभर तीन सय बेडकै बनाउछौं,’ मन्त्री पौडेलले भने ‘तीन सय बेडको ओ एन्ड एम गर्दैछौं । वार्षिक ६५ करोडजति खर्च लाग्ने रहेछ । सकेसम्म तीन सय बेडकै अस्पताल सञ्चालन गर्ने प्रयास गर्छौं ।’

त्यससँगै गेटामा एमबीबीएस सञ्चालन गर्न कुनै बाधा नहुने मन्त्री पौडेलको भनाइ छ । ‘छ वटा प्रदेशमा एमबीबीएस पढाइ सञ्चालन भइसकेको छ । सुदूरपश्चिममा मात्रै बाँकी हो,’ उनले भने ‘तीन सय बेड, तीन वर्ष सञ्चालन नभएको भएपनि विशिष्ट अवस्थाका कारणले चिकित्सा शिक्षा आयोगले अहिले नै गेटामा एमबीबीएस सञ्चालनका लागि निर्णय गर्न सक्छ ।’