विराटनगर — नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहालले आगामी निर्वाचनबाट माओवादीलाई देशकै पहिलो पार्टी बनाउने र भ्रष्टाचारलाई जरैबाट उखेलेर फाल्ने उद्घोष गरेका छन् ।
भारतसँग सीमा जोडिने दक्षिणी झापाको गौरीगञ्ज गाउँपालिकामा सोमबार आयोजित खबरदारी सभालाई सम्बोधन गर्दै दाहालले त्यस्तो उद्घोष गरेका हुन् ।
दाहालले २०८४ को निर्वाचनमा आफ्नो पार्टी पहिलो बन्ने दाबी गरे । उनले पछिल्लो उपनिर्वाचनमा कोशी प्रदेशमा माओवादी पहिलो पार्टी बनेको उदाहरण पेस गर्दै उनले अब माओवादी एक्लै चुनाव लड्न सक्ने हैसियतमा पुगेको र कांग्रेस वा एमालेसंग मिल्न जरुरी नरहेको जनाए ।
माओवादी केन्द्रले भ्रष्टाचारविरोधी अभियानलाई राष्ट्रिय अभियानका रूपमा अघि बढाएको र यस अभियानमा जनताको साथ थपिएमा भ्रष्टाचारमुक्त नेपाल निर्माण सम्भव रहेको दाहालको जिकिर थियो ।
‘अब मसँग भ्रष्टाचारमुक्त मुलुक निर्माण गर्ने, उपेक्षित र उत्पीडित जनतालाई अधिकारसम्पन्न बनाउने र आर्थिक समृद्धिमार्फत जनताको जीवनस्तर बदल्नेबाहेक अरु कुनै विकल्प छैन,’ दाहालले भने, ‘तपाईंहरू (जनता) को तागत मसँग जोडियो भने देशबाट दलाल, बिचौलिया र भ्रष्टहरूलाई लखेटेर भ्रष्टाचारमुक्त मुलुक बनाउने सम्भव छ र बनाइने छ ।’
