बिगो तथा जरिवानाबाट १० करोड ७२ लाख असुल उपर गरी जेल सजायसमेतको माग
काठमाडौँ — राजस्व चुहावट गराएको आरोपमा जनकपुर छोटी भन्सारका चार जना कर्मचारीसहित ३४ जनाविरुद्ध उच्च अदालत जनकपुरको अस्थायी इजालस वीरगन्जमा मुद्दा दायर गरिएको छ । राजस्व अनुसन्धान विभागकी प्रवक्ता एवं उपमहानिर्देशक कृष्ण कुमारी श्रेष्ठकी अनुसार उनीहरूबाट बिगो तथा जरिवानाबाट १० करोड ७२ लाख असुल उपर गरी जेल सजायसमेतको माग गरिएको छ ।
विभागले पथलैया राजस्व कार्यालयमार्फत दुई भारतीय नागरिक, कर्मचारी र व्यापारीविरुद्ध मुद्दा दायर गरेको हो ।
राजस्व अनुसन्धान कार्यालय पथलैयाले जनकपुर भन्सार अन्तर्गतको लग्मा जटही छोटी भन्सारबाट छुटेको ट्रकको सामान भौतिक परीक्षण गर्दा राजस्व चुहावट भएको फेला परेको थियो । उक्त ट्रक गत असोजमा पथलैया प्रहरीले नियन्त्रणमा लिएर राजस्व कार्यालय बुझाएको थियो ।
राजस्वले करिव तीन महिनाको अनुसन्धान पछि बुधबार मुद्दा दायर गरेको जानकारी विभागले दिएको छ । उक्त भन्सारबाट जाँच पास भएका भारतीय नम्बरका दुई वटा ट्रकमा भन्सार नतिरी आयात गरेको कुर्ता सलवारसहितका कपडा भेटिएको थियो ।
मुद्दा लगाइएका भारतीयहरूमा ट्रक चालकद्वय मधुवनी जोरलाका ३६ वर्षीय अहम्मद आलम र सुलतानपुर बररलाका ४० वर्षीय शेरबहादुर सिंह छन् । अदालतले मागेको १५–१५ लाख धरौटी बुझउन नसकेका कारण उनीहरू जेलमा छन् ।
त्यस्तै बेंसीसहर नगरपालिका–१० लमजुङका महेन्द्र गुरुङ, रुरु क्षेत्र गाउँपालिका–५ गुल्मीका रुद्र प्रसाद श्रेष्ठ एवं २५ जना भारतीय सैनिकमा निवृत्त भएका नेपालीसमेतविरुद्ध मुद्दा दायर गरिएको जानकारी विभागले विज्ञप्तिमार्फत दिएको छ ।
भारतीय सैनिकबाट निवृत्त भएपछि आफ्नो व्यक्तिगत र निश्चित मूल्यका नयाँ सामान ल्याउन पाउने सुविधको दुरुपयोग गरेर कुर्ता सलवार ल्याएको आरोप पथलैया कार्यालयले लगाएको छ ।
सामान ल्याएको ट्रकमासँगै आएका गुल्मीका रुद्रप्रसाद केहीबेरमा आउने भन्दै सम्पर्कविहीन भएका थिए । उक्त सामान उनको भएको अनुमान गरिएको छ । राजस्व स्रोतले सामान आफ्नो नभएको अवस्थामा उनी फरार भएकाले शंकाको घेरामा राखिएको जानकारी दिएको छ ।
सामान पथलैया प्रहरीले बरामद गरेर राजस्व कार्यालयमा बुझाएको थियो । बरामद गरिएको अधिकांश सामान भन्सार नतिरेको कुर्ता सलवार भएको अनुसन्धानमा खटिएका पथलैयाका कर्मचारीले बताए ।
