पोखरा — सहकारी ठगी आरोपमा कास्की हिरासतमा रहेका रास्वपा सभापति रवि लामिछानेको तस्बिर सार्वजनिक भएको घटनाबारे छानबिन गर्न प्रहरी प्रधान कार्यालयले समिति गठन गरेको छ । प्रहरीको गण्डकी प्रदेश तालिम केन्द्रका प्रमुख तथा वरिष्ठ उपरीक्षक मुकुन्द मरासिनीको नेतृत्वमा चार सदस्यीय समिति गठन गरिएको हो ।

यसअघि गृहमन्त्री रमेश लेखकले तस्बिर सार्वजनिक गर्ने र जिम्मेवार प्रहरी अधिकारीमाथि अनुसन्धान गर्न प्रहरी महानिरीक्षक वसन्त कुँवरलाई निर्देशन दिएका थिए । 

हिरासतको कोठामा लामिछाने सिरक ओढेर सुतिरहेको तस्बिर बुधबार सामाजिक सञ्जालमा सार्वजनिक भएपछि कसरी बाहिर आयो भन्ने बहस बिहीबार सुरु भएको थियो । रास्वपाले तस्बिर सार्वजनिक हुनुमा प्रहरीलाई दोष दिएको थियो । लामिछानेकै सहयोगी दीपक बोहोराले बुधबार राति फेसबुकमा लामिछाने कास्की प्रहरीको हिरासतभित्र सिरक ओढेर सुतिरहेको तस्बिर राखेका थिए । 

‘अन्याय गर्नुको पनि हद हुन्छ । रवि दाइ हिरासत कक्षमा सुतेको सीसीटीभीको यो फोटो कास्की प्रहरीले कसलाई पठाउन स्क्रिनसट गरेको होला ?,’ उनले प्रश्न गरेका थिए, ‘अनि के उद्देश्यका लागि सार्वजनिक गरियो ? कति हो यो फोटोको मूल्य ? न्याय मरेको छैन भने कसैले न कसैले त यसको मूल्य चुकाउनुपर्ला ।’

 बिहीबार बिहानसम्म उक्त तस्बिर सामाजिक सञ्जालमा ‘भाइरल’ भइसकेको थियो । बोहोराले आफ्ना सभापतिको तस्बिर फेसबुकमा राखेको १२ घण्टा नबित्दै आफूलाई रास्वपाकै ‘एक शुभचिन्तक’ बताउने चिकित्सक निकोलस भुसालले तस्बिर सार्वजनिक गरेको जिम्मा लिएका छन् । 

उनले उक्त तस्बिर गत शनिबार दिउँसो ४ बजे खिचिएको र मंगलबार फेसबुकमा राखेको बताएका छन् । त्यो दिन लामिछानेलाई भेट्न र हौसला दिन हिरासतमै गएको उनको भनाइ छ । हिरासतमा लामिछानेको स्वास्थ्य अवस्था बुझेर फर्किएपछि जिल्ला प्रहरी कार्यालयको ‘कन्ट्रोल रुम’ मा बस्ने क्रममा सीसीटीभी फुटेजको ‘डिस्प्ले’ हुने टीभी ‘स्क्रिन’ बाट उक्त तस्बिर खिचेको उनले बताएका छन् ।

‘भेटेर निस्किएपछि सीसीटीभीको मनिटरमा फोटो खिचेको हुँ, हिरासतभित्र खिचेको होइन, सीसीटीभी क्यामेराको फुटेज खिचेको हो । अन्यथा सोचेको थिइँन, तर गल्तीको लागि जिम्मेवारी लिएर क्षमा माग्छु ।’

भुसालले उक्त तस्बिर बाहिर ल्याउनु गल्ती भएको भन्दै सजाय भोग्न तयार रहेकोसमेत बताएका छन् । ‘मबाट कसैलाई दोष लगाउने या खराब नियत थिएन,’ उनले भनेका छन्, ‘भ्रममा नपर्न अनुरोध छ । म स्वास्थ्य अवस्था बुझ्न र हौसला प्रदान गर्न गएको थिएँ, भाइरल गराउँछु भन्ने सोचेर होइन । कसरी बसिरहेका छन् भनेर बुझाउन फोटो खिचेको हुँ ।’

लामिछानेको तस्बिर बाहिरिएपछि प्रहरीको आलोचना भएको छ । जिल्ला प्रहरी कार्यालय परिसरभित्र प्रवेश गर्नेबित्तिकै गेटनजिकै प्रहरीले सर्वसाधारणको मोबाइल राख्ने गरेको छ । तर, भुसालले भने आफूसँग मोबाइल नमागिएको दाबी गरेका छन् । उनले प्रहरीकै अगाडि उक्त फोटो खिचेको र आफूले फोटो खिच्दाको फुटेज पनि प्रहरीसँग हुनुपर्ने जिकिर गरेका छन् । 

जिल्ला प्रहरी कार्यालय कास्कीले बिहीबार विज्ञप्ति जारी गर्दै उक्त तस्बिर सार्वजनिक भएकोप्रति गम्भीर ध्यानाकर्षण भएको जनाएको छ । सहकारी ठगी, संगठित अपराध र सम्पत्ति शुद्धीकरण कसुरको तथ्यपूर्ण अनुसन्धानलाई नकारात्मक प्रभाव पार्ने गरी भुसालको फेसबुक पेजबाट तस्बिर प्रकाशित हुँदा प्रहरीको व्यावसायिकतामा आँच आउने किसिमले विभिन्न सामाजिक सञ्जालमा अनधिकृत तस्बिर सम्प्रेषण भएको विज्ञप्तिमा उल्लेख छ । 

प्रचलित साइबर अपराधसम्बन्धी कानुनी प्रावधानलाई समेत उल्लंघन गरी अनधिकृत रूपमा सामग्री प्रकाशन तथा सम्प्रेषण गर्ने कार्यमा संलग्न जोकोही व्यक्तिलाई पनि कानुनी दायरामा ल्याइ कानुनबमोजिम अनुसन्धान तथा कारबाही गरिने विज्ञप्तिमा बताइएको छ । जिल्ला प्रहरी कार्यालय कास्कीका प्रवक्ता डीएसपी वसन्तकुमार शर्माले घटनाबारे छानबिन भइरहेको बताएका छन् । 

प्रारम्भिक अनुसन्धानमा भुसालले उक्त तस्बिर सार्वजनिक गरेको थाहा भए पनि थप छानबिनपछि मात्र स्पष्ट हुने डीएसपी शर्माले बताए । ‘छानबिनपछि पक्राउ गरेर आवश्यकताअनुसार कुन कानुनमा टेकेर कारबाही गर्ने भन्ने छलफल गर्दै छौं,’ उनले भने, ‘दुई–तीनवटा कानुन आकर्षित हुने देखिन्छ ।’