काठमाडौँ — निजामती विधेयक महिलामैत्री नभएको भन्दै कांग्रेस सांसदले आपत्ति जनाएकी छैन । सेवा प्रवेशको उमेर घटाउनेदेखि महिला विकास अधिकृतको पदोन्नतिको उचित व्यवस्था नभएकाले संघीय निजामती सेवा विधेयक महिलामैत्री नभएको कांग्रेस सांसद रमा कोइरालाले आपत्ति जनाएकी हुन् । 

प्रतिनिधिसभाको राज्यव्यवस्था तथा सुशासन समितिको बुधबारको बैठकमा संघीय निजामती सेवाको गठन, सञ्‍चालन र सेवाका सर्त सम्बन्धमा व्यवस्था गर्न बनेको विधेयकमाथि छलफल गर्न संशोधनकर्ताका रूपमा उपस्थित भएकी सांसद कोइरालाले यसअघि महिलाले निजमती सेवामा प्रवेश पाउने उमेर ४० रहेकोमा हाल घटाइएको भन्दै आपत्ति जनाएकी हुन् ।

उनले भनिन्, 'संघीय निजामती सेवा विधेयक जसरी आएको छ यो महिलामैत्री छैन । आजको संविधानले १ तिहाई महिला निजामती सेवामा प्रवेश गर्न पाउने अधिकार दिएको छ र १ तिहाइ महिला निजामती सेवामा प्रवेश गर्दैछन् । उनीहरू प्रवेश गरिरहेको अवस्थामा विधेयक भने महिलामैत्री आएको छैन कि लागेको छ ।'

महिला विकास अधिकृत माथिल्लो पदमा जाने व्यवस्था नरहेको कुरालाई नजरअन्दाज गरिएको सांसद कोइरालाको भनाइ थियो । उनले महिला विकास अधिकृतलाई माथिल्लो पदमा जाने कानुनी व्यवस्था खुलाउनुपर्ने बताइन् ।