काठमाडौँ — राष्ट्रिय स्वतन्त्र पार्टीका सांसद शिशिर खनालले नेपालका विश्वविद्यालयमा सर्वोत्कृष्ट हुने विद्यार्थीहरूलाई निजामती सेवामा सिधै प्रवेश गराउनका लागि कानुनी व्यवस्था गर्नुपर्ने बताएका छन् ।
प्रतिनिधिसभाको राज्यव्यवस्था तथा सुशासन समितिको बुधबारको बैठकमा संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकमाथि छलफलका क्रममा सांसद खनालले विश्वविद्यालयमा 'गोल्ड मेडल' प्राप्त गर्ने विद्यार्थीलाई नेपालमा नै सेवा दिने वातावरण बनाउनुपर्ने प्रस्ताव गरेका हुन् ।
निजामती सेवामा युवाहरूलाई आकर्षित गर्ने र विश्वविद्यालयमा सर्वोत्कृष्टलाई नेपालमा नै काम गर्ने वातावरण बनाउनका लागि निजामती सेवाका उच्च पदहरूमा बाहिरका व्यक्तिहरूको सिधै नियुक्ति (ल्याटरल इन्ट्री) को व्यवस्था राख्नुपर्ने प्रस्ताव खनालले राखेका हुन् । 'नेपाली विश्वविद्यालयका टपरहरू (गोल्ड मेडलिस्ट) लाई सिधै निजमती सेवामा प्रवेशका लागि कानुन बनाउनुपर्छ । निजामती सेवा विधेयकमा ल्याटरल इन्ट्रीको व्यवस्था गरौं जसका कारण नेपालका विश्वविद्यालय टप गर्नेहरूले अमेरिका, अस्ट्रेलियाका युनिभर्सिटीहरूमा प्रोफेसर बन्ने भन्दा पनि नेपालको निजामती सेवामा प्रवेश गरुन्,' खनालको प्रस्ताव थियो । यस्तो व्यवस्था गर्दा मुलुकको निजामती सेवाप्रति आकर्षण बढ्ने उनको तर्क थियो ।
युवाहरूलाई निजामती सेवामा आकर्षित गर्नका लागि पनि कानुनी व्यवस्था निजामती विधेयकमा राख्नुपर्ने बताए ।
त्यस्तै, आरक्षणको व्यवस्था एक व्यक्तिलाई एक पटकका लागि मात्रै गर्नुपर्ने प्रस्ताव पनि खनालले राखेका छन् । उनले एउटै व्यक्ति आरक्षणबाट सेवा प्रवेश गर्ने र त्यसपछि पनि बारम्बार आरक्षणबाट नै पदोन्नती हुने व्यवस्था सही नभएको बताए ।
सांसद खनालले सहसचिवमा खुला प्रतिस्पर्धाको व्यवस्था राख्न नहुने पनि बताएका छन् । उनले सिधै सहसचिवमा खुला प्रतिस्पर्धाबाट आउँदा अनुभवकाे कमीका कारण काममा प्रभाव पर्ने बताए । सहसचिव पद आन्तरिक प्रतिस्पर्धाबाट गर्नुपर्ने उनको भनाइ छ ।
