बुटवल — गृहमन्त्री रमेश लेखकले शासन भीडले नभई कानुनले चल्ने बताएका छन् । त्यस्तो भीड नियन्त्रण गर्ने दायित्व सुरक्षा निकायकै भएको पनि उनले बताए । 

 गृहमन्त्री लेखकले पछिललो समय साइबर क्राइम बढेको, भीडले सत्ता चलाउने प्रयास हुन थालेको बताउँदै यसलाई पनि नियन्त्रण गर्न निर्देशन दिए । पछिल्लो समय आर्थिक र वित्तीय अपराध बढेको, ठगीका घटना बढेको, रकम अपचलनमा लिप्त हुनेहरू संगठित हुन थालेको र त्यसलाई भीडले ढाकछोप गर्ने प्रयास भइरहेको बताए । ‘सत्ता चलाउने कानुनले हो, भीडले होइन,’ उनले भने, ‘पछिल्ला दिनहरूमा प्रहरी कार्यालय, सरकारी वकिल कार्यालय, अदालत लगायतका स्थानहरूमा भीडले प्रभावित गर्ने प्रयास भइरहेको छ । त्यो नियन्त्रण हुनै पर्छ,’ उनले भने, ‘यस्तो समाजलाई दुषित गारउने तत्वको संरक्षण कुनै पनि अवस्थमा स्वीकार्य हुँदैन् ।’ 

संविधानको सुरक्षा र लोकतन्त्रको सुदृढीकरणका लागि शान्ति सुरक्षा मजबुत हुनुपर्छ, त्यसका लागि पनि यस्ता गोष्ठी महत्त्वपूर्ण हुने उनले बताए । उनले शान्ति सुरक्षा खलबलिने वित्तिकै मौलिक हकहरू गुम्ने भएकाले लोकतन्त्रको पूर्वसर्त नै शान्तिसुरक्षा रहेको बताए । उनले संविधानको सही कार्यान्वयनका लागि शान्ति सुरक्षा नै प्रमुख सवाल हुने भएकाले यसतर्फ ध्यान दिन आग्रह गरे ।

 गृहमन्त्री लेखकले शान्ति, सुशासन, विकास र समृद्विका लागि पनि शान्तिसुरक्षा अनिवार्य सर्त रहेको बताए । सीमा क्षेत्रको तस्करी र राजश्व चुहावट रोक्न पनि सुरक्षा निकायलाई निर्देशन दिएका छन् । गृह मन्त्रालय र आन्तरिक मामिला मन्त्रालय लुम्बिनी प्रदेशको संयुक्त आयोजनामा मंगलबारदेखि भैरहवामा सुरु भएको प्रदेशस्तरीय सुरक्षा गोष्ठीलाई सम्बोधन गर्दै उनले सिमानामा भइरहेका अपराध, तस्करी, राजस्व चुहावट रोक्न निर्देशन गरेका हुन् । अहिले पनि सीमा क्षेत्रमा राजश्व चुहावट र तस्करी बढेको सुचना मन्त्रालयसम्मै आइरहेको उनले बताए । ‘क्रसबोर्डर अपराध भइरहेको छ, तस्करी मौलाएको र राजस्व चुहावट भइरहेको सुचना आइरहेका छन्,’ उनले भने, ‘आजको यो सुरक्षा गोष्ठी सकिएपछि यस्तो गुनासो सुन्न नपरोस ।’ उनले गोष्ठी सकिएपछि पनि राजश्व चुहावट र तस्करी नियन्त्रण हुन नसकेका गुनासा बढेको अवस्थमा सीमा क्षेत्रका प्रमुख जिल्ला अधिकारी र सुरक्षा निकायका प्रमुखहरूलाई स्थानान्तरण गर्ने प्रक्रियामा सरकार लाग्ने बताए ।