काठमाडौँ — स्थानीय तहको उपनिर्वाचनमा कमजोर नतिजा आएपछि झस्किएको एमालेले राष्ट्रिय शक्ति निर्माणको लक्ष्यसहित ६ संकल्प गरेको छ । संघीय राजधानीमा आयोजित प्रदेश, जिल्ला र भ्रातृ संगठनका इन्चार्ज, अध्यक्ष र सचिवको दुईदिने कार्यशालाले पार्टी संगठन गतिशील बनाउन र जनतासँग जोडिन भन्दै संकल्प प्रस्ताव पारित गरेको हो । 

एमालेले राष्ट्रिय शक्ति निर्माणका लागि ‘मिसन ०८४’ भने पनि स्थानीय तहको उपनिर्वाचनमा प्राप्त नतिजाले राम्रो संकेत नगरेको भन्दै ‘जरैसम्म पार्टी निर्माण’ को अभियान चलाउने निर्णय गरेको छ ।

एमालेले २०८४ को निर्वाचनमा पहिलो पार्टी बनाउने अभियान सुरु गरे पनि कमिटीहरू प्रभावकारी हुन नसकेको कार्यशालाको निष्कर्ष थियो । आइतबार सकिएको कार्यशालाले संगठन सृदृढीकरणको अभियानलाई तीव्र पार्ने निर्णय गरेको छ । 

संघ, प्रदेश र स्थानीय सरकारका कामकारबाहीलाई जनतासँग जोड्ने र त्यसका लागि पार्टी संगठन सक्रिय बनाउने कार्यक्रम पनि तय भएको छ ।

एमाले प्रचार विभाग प्रमुख राजेन्द्र गौतमले पार्टी संगठनलाई देशको तल्लो तहसम्म पुर्‍याउन संकल्प प्रस्ताव घोषणा गरिएको जानकारी दिए । उनका अनुसार वडाकेन्द्रित अभियान चलाउने मुख्य संकल्प एमालेले लिएको छ । निर्णायक राष्ट्रिय शक्ति निर्माणका लागि भन्दै माघदेखि ३ महिने वडाकेन्द्रित अभियान सञ्चालन गर्ने संकल्प एमालेले गरेको हो । 

राष्ट्रिय कार्यशालाले आधारभूत तहसम्म कमिटी निर्माण गर्ने र सदस्यता विस्तारसँगै ‘जनतासँग जनसंगठन अभियान’ सञ्चालन गर्ने संकल्प पनि लिएको छ । संगठन विभाग प्रमुख काशीनाथ अधिकारीले पेस गरेको विवरणअनुसार हाल एमालेमा संगठित सदस्य करिब तीन लाख छन् । त्यो संख्या बढाउने एमालेको संकल्प छ ।

२०८२ को पार्टी सदस्यता नवीकरण २०८१ भित्रै विधिसम्मत ढंगले गर्ने र सबै पार्टी सदस्यलाई अनलाइनमा जोड्ने निर्णय भएको छ । एमालेमा २३ भ्रातृ संगठनका २० लाख सदस्य रहेको तथ्यांक छ । 

युवालाई पार्टीमा जोड्ने नीति लिँदै २०८१ चैतसम्ममा राष्ट्रिय युवा महोत्सव आयोजना गर्ने निर्णय पनि राष्ट्रिय कार्यशालाले गरेको छ । एमाले नेतृत्वविरुद्ध घेराबन्दी, आक्रमण भएको जनाउँदै त्यसको प्रतिवाद गर्न नेता तथा कार्यकर्तालाई निर्देशन दिइएको छ । प्रचार विभाग प्रमुख गौतमका अनुसार कार्यशालामा १० विषयमा केन्द्रित भएर समूहगत छलफल गरिएको थियो ।

पार्टी अनुशासन, पार्टी कामको अनुगमन र मूल्यांकन, आर्थिक–सामाजिक रूपान्तरणका लागि जनसरोकार, स्थानीय तहसम्म केन्द्रित पार्टी सुदृढीकरण, व्यवस्थित पार्टी प्रणाली, पार्टीभित्र असन्तुष्टि, अन्तरविरोध र गुटबन्दी अन्त्य, जनसंगठन र गैरभौगोलिक क्षेत्रमा संगठन निर्माण, पार्टी केन्द्रलाई सुझाव, नयाँ सदस्य वृद्धि तथा पार्टी सदस्य सबलीकरण, पार्टी प्रणाली र नेता तथा कार्यकर्ताको कार्यशैली सुधारमा एमालेले छलफल गराएको हो । 

समूहका नेताहरूले केन्द्रदेखि वडा तहसम्मका संगठन सुदृढीकरण गर्ने हो भने जनसरोकारका विषयलाई सम्बोधन गर्नुपर्ने, नेता तथा कार्यकर्ता जनतासँग प्रत्यक्ष जोडिनुपर्ने सुझाव दिएका थिए । समूह नेताहरू कृष्णप्रसाद जैसी, गुलाबजंग शाह, पीताम्बर भुसाल, समिक बडाल, चण्डेश्वर मण्डल, कैलाश ढुंगेल, नवराज शर्मा, खड्गबहादुर राई, पदम खड्का र सूर्य पाठकले वडासम्म कमिटी भए पनि त्यसको व्यावहारिक क्रियाशील नहुँदा केही समस्या भएको लिखित भनाइ राखेका थिए । कतिपय प्रदेश र जिल्लामा गुटबन्दी भएकाले काम हुन नसकेको रिपोर्टिङ पनि गरिएको थियो ।

 कार्यशालालाई सम्बोधन गर्दै अध्यक्ष केपी शर्मा ओलीले एमालेमा उपाध्यक्ष विष्णु पौडेल र महासचिव शंकर पोखरेलको गुट भएको आफूले सुनेको तर त्यो सत्य नभएको बताएका थिए । उनले पार्टीमा गुटबन्दी सह्य नहुने उल्लेख गर्दै सबै नेता आफ्ना लागि बराबर भएका बताएका थिए ।

अध्यक्ष ओलीले पार्टीमा फरक देखिन असहमति राख्ने प्रवृत्ति देखिएको बताएका थिए । ‘पार्टीमा विमति जनाउने तर सही बाटो के हो, त्यो पहिल्याउन नसक्ने ! असहमति राखेर आफूलाई पृथक् देखाउने प्रवृत्ति छ,’ उनले भनेका थिए, ‘इमानदारपूर्वक काम गरे पार्टीमा सुधार आउँछ, सही दिशा अपनाउन इमानदारी चाहियो ।’