पोखरा — सहकारी ठगी, संगठित अपराध र सम्पत्ति शुद्धीकरणसम्बन्धी कसुर अनुसन्धानका लागि प्रहरी हिरासतमा रहेका रास्वपाका सभापति एवं पूर्वगृहमन्त्री रवि लामिछानेले संसदीय छानबिन विशेष समितिका सभापति सूर्य थापामाथि आक्रोश पोखेका छन् ।

 म्याद थपका लागि बिहीबार जिल्ला अदालतमा उपस्थित गराइएका लामिछानेले थापाले लेखेको ‘स्क्रिप्ट’ अनुसार सरकारबाट आफूमाथि व्यवहार भइरहेको आरोप लगाए । 

इजलासमा लामिछानेले समितिको प्रतिवेदनले आफूलाई निर्दोष ठहर्‍याए पनि सभापति थापाले बोलेको कुरा पुगिरहेको बताए । ‘यहाँ–यहाँ पुर्‍याइन्छ, यो–यो ठाउँ घुमाइन्छ, संगठित अपराध र सम्पत्ति शुद्धीकरण आकर्षित हुन्छ भनेर उहाँ (थापा) ले मिडियामा भन्दै हिँड्नुभएको थियो,’ उनले भनेका थिए, ‘त्यही स्क्रिप्टअनुसार अहिले छायांकन भइरहेको छ । अहिले मध्यान्तर भएको छ । यो योजनाबद्ध तरिकाले लेखिएको कथा हो । यो सबै लेखक सूर्य थापाको कर्तुत हो ।’ उनले आफूमाथि राजनीतिक प्रतिशोध साधिएको, ‘मिडिया ट्रायल’ गरिएको, सरकारले दु:ख दिने नियत राखेको तर्क दोहोर्‍याएका थिए । 

आफूलाई राज्यले लखेटिरहेको दाबी गर्दै यस्तो अवस्थामा हिरासतमुक्त गर्ने आदेश दिएर ऐतिहासिक काम गर्न लामिछानेले न्यायाधीशसँग आग्रह गरेका थिए । ‘मलाई जसरी फिल्मी शैलीमा छायांकन गरिराखिएको छ, त्यसले भोलि के हुने हो भन्ने मनमा लागिराखेको छ । तर, भगवान्रूपी न्यायाधीशहरू भएका कारण आदेश र फैसलामा मैले न्याय पाउने नै छु,’ लामिछानेको भनाइ उद्धृत गर्दै जाहेरवालातर्फका अधिवक्ता युवराज पराजुलीले भने, ‘आशा छ, श्रीमान्बाट ऐतिहासिक काम हुनेछ । भोलि रिटायर्ड भएर गइसकेपछि परिवारसँग रहँदा, बस्दा राज्यबाट खेदिएको मान्छेलाई हिरासतबाट मुक्त गरिदिएको थिएँ भनेर श्रीमान्ले गर्व गर्ने ठाउँ हुनेछ ।’