काठमाडौँ — दक्षिण एसिया भ्रमणमा आएका अमेरिकी सहायक विदेशमन्त्री डोनाल्ड लुले आइतबार कांग्रेस सभापति शेरबहादुर देउवा र माओवादी अध्यक्ष पुष्पकमल दाहालसँग भेटवार्ता गरेका छन् । दक्षिण तथा मध्य एसिया मामिला विदेश सहायकमन्त्री लु बाइडेन प्रशासनको अन्त्यमा श्रीलंका हुँदै तीनदिने नेपाल भ्रमणमा आएका हुन् ।

सहायकमन्त्री लु सभापति देउवासँग भेट्न आइतबार बूढानीलकण्ठ पुगेका थिए । भेटवार्तामा दुई मुलुकबीचका बहुआयामिक सम्बन्धका विषयमा कुराकानी भएको देउवाका स्वकीय सचिव भानु देउवाले जानकारी दिए ।

लुले दुई मुलुकबीचको सम्बन्धलाई थप बलियो बनाउने विषयमा कुरा गरेका थिए । ‘उहाँहरूबीचमा नेपाल–अमेरिकाको समग्र पक्षमा कुराकानी भएको थियो । उहाँहरूले अन्तर्राष्ट्रिय परिवेशलगायत विषयमा पनि छलफल गर्नुभयो,’ स्वकीय सचिव देउवाले भने । 

देउवालाई भेटेपछि लु माओवादी अध्यक्ष दाहाललाई भेट्न खुमलटार पुगेका थिए । अध्यक्ष दाहालको सचिवालयका अनुसार दाहालले यस्ता भ्रमण र भेटवार्ताले आपसी सम्बन्धलाई थप बलियो बनाउने विश्वास व्यक्त गरे । नेपाल आर्थिक समृद्धिको बाटोमा अघि बढ्न खोजिरहेको उल्लेख गर्दै अध्यक्ष दाहालले यसमा अमेरिकालगायत अन्तर्राष्ट्रिय समुदायको सहयोग र सद्भाव महत्त्वपूर्ण हुने बताएको सचिवालयले जनाएको छ ।

‘हामीले कृषिलाई आधार मानेर ऊर्जा र पर्यटन विकासलाई जोड दिने नीति लिएका छौं,’ उनले भने, ‘सबै क्षेत्रमा सूचना प्रविधिलाई लिडिङ रोलमा राखेर मात्रै नेपाललाई समृद्ध बनाउन सकिन्छ भन्ने हाम्रो विश्वास छ । यसका लागि अन्तर्राष्ट्रिय समुदायबाट हुने सहयोग र लगानी महत्त्वपूर्ण हुन्छ ।’ दाहालले नेपालको शान्ति प्रक्रिया राष्ट्रिय सहमतिका साथ मौलिक रूपमा सम्पन्न हुन थालेको जानकारी गराए ।