रोल्पा — स्थानीय तह उपनिर्वाचनले माओवादी केन्द्रको पक्षमा जनमत बढेको पुष्टि भएको माओवादी केन्द्रका उपमहासचिव वर्षमान पुनले बताएका छन् । कहिले कांग्रेस त कहिले एमालेको साथले माओवादी केन्द्र टिकेको भन्ने प्रचार पनि खारेज भएको पुनको भनाइ छ ।

रोल्पामा मंगलबार आयोजित पार्टीको कार्यक्रमलाई सम्बोधन गर्दै उपमहासचिव पुनले फरक विचार, नीति र जनताको प्रवृत्ति बोक्ने दलका रूपमा माओवादीलाई जनताले अनुमोदन गरेको बताए । कांग्रेस र एमालेले माओवादी एक्लै चुनावी प्रतिस्पर्धामा गए सकिने भन्दै फैलाएको अफवाहलाई जनताले खारेज गरेको पनि उनको भनाइ थियो । ‘हामी कसैले कसैसँग तालमेल नगरी एक्लै चुनावमा जान सक्दैनौं भन्ने गलत भाष्य स्थापित गर्ने कोसिस भएको थियो,' उनले भने, ‘कहिले एमालेले र कहिले कांग्रेसले साथ दिएर माओवादी टिकेको हो भन्ने प्रचारलाई हामीले खारेज गरेका छौं । उपचुनावको परिणामबाट जनताले त्यसको जवाफ दिएका छन् । हामीले आफ्नो जनमत देखाएका छौं ।’

पछिल्ला केही निर्वाचनमा तालमेलमार्फत कांग्रेस र एमालेले माओवादीको मत लिएको तर माओवादीलाई मत नदिएको कुरा पनि स्थानीय तह उपनिर्वाचनले देखाएको पुनको भनाइ थियो । कांग्रेस र एमालेको जनमत घटेको र माओवादीको जनमत बढेको पनि पुनले दाबी गरे । जितेका ११ ठाउँबाहेकमा पनि धेरै स्थानमा माओवादी दोस्रो भएकाले पनि माओवादीको जनमत बढेको उनको भनाइ थियो ।