बेइजिङ — प्रधानमन्त्री केपी शर्मा ओली चिनियाँ समकक्षी ली छ्याङको निमन्त्रणामा चारदिने भ्रमणका लागि सोमबार बेलुकी बेइजिङ आइपुगेका छन् । ३९ सरकारी प्रतिनिधि र ४८ निजी क्षेत्रका सहित ८७ सदस्यीय टोलीको नेतृत्व गर्दै हिमालय एयरलाइन्सको चार्टर विमानबाट आएका ओलीलाई बेइजिङस्थित क्यापिटल अन्तर्राष्ट्रिय विमानस्थलमा चिनियाँ कम्युनिस्ट पार्टीका वैदेशिक मामिला उपमन्त्री सुन बेइदोङले स्वागत गरे । 

गत असार ३० मा चौथो पटक प्रधानमन्त्री बनेयता ओलीको यो पहिलो द्विपक्षीय विदेश भ्रमण हो । उनी यसअघि संयुक्त राष्ट्रसंघको ७९ औं महासभामा भाग लिन न्युयोर्क गएका थिए । प्रधानमन्त्रीका रूपमा ओलीको यो तेस्रो चीन भ्रमण हो । यसअघि उनले २०७३ र २०७५ मा चीन भ्रमण गरेका थिए । 

प्रधानमन्त्री ओलीले मंगलबार चिनियाँ राष्ट्रपति सी चिनफिङ र प्रधानमन्त्री ली छ्याङसँग भेटवार्ता गर्नेछन् । चिनियाँ समकक्षी लीसँगको वार्तामा दुई मुलुकबीचका एजेन्डामा छलफल हुने तथा सहमति र सम्झौतामा हस्ताक्षर गर्ने कार्यक्रम छ । 

भूराजनीतिक चासोसमेत रहेका कारण चीनको महत्त्वाकांक्षी परियोजना ‘बीआरआई’ को कार्यान्वयन सम्झौतामा हस्ताक्षर गर्ने/नगर्ने विषयमा नेपाली पक्षमा लामो समयसम्म अन्योल थियो । ‘बीआरआई सहकार्य फ्रेमवर्क’ को मस्यौदामा सत्तारूढ दल कांग्रेस र एमालेबीच लामो गृहकार्य चल्यो । 

दुई दलको कार्यदलले ‘फ्रेमवर्क’ लाई टुंगो लगाएको थियो । त्यसपछि मात्र नेपाली पक्ष चीन भ्रमणका क्रममा ‘बीआरआईको फ्रेमवर्क’ मा हस्ताक्षर गर्ने निष्कर्षमा पुगेको हो । चिनियाँ पक्षले त्यसमा हस्ताक्षर गर्ने नेपाली पक्षको विश्वास छ । नेपालले २०१७ मै ‘बीआरआई’ को समझदारीपत्रमा हस्ताक्षर गरे पनि चीनले २०२० मा प्रस्ताव गरेको ‘बीआरआई कार्यक्रम कार्यान्वयन योजना’ मा भने हालसम्म हस्ताक्षर गरेको छैन । 

चीनले पठाएको मस्यौदामा संशोधन गरी नेपालले ‘बीआरआई सहकार्य फ्रेमवर्क’ तयार पारेको हो । प्रधानमन्त्री चीन उड्नु अघिल्लो दिन आइतबार मन्त्रिपरिषद् बैठकले उक्त ‘फ्रेमवर्क’ सहित चीनसँग हुने सहमति, सहकार्य र सम्झौताका एजेन्डा स्वीकृत गरेको छ ।