काठमाडौँ — माओवादी केन्द्रका वरिष्ठ उपाध्यक्ष नारायणकाजी श्रेष्ठले मुलुकमा लोकतन्त्रमाथि विभिन्न कोणबाट आक्रमण भइरहेको बताएका छन् । उनले विगतमा झैं प्रतिनिधिसभा विघटनको खतरा बाँकी नै रहेको पनि बताए ।

'आज विभिन्न कोणबाट लोकतन्त्रमाथि आक्रमण भइरहेको छ,' माओवादी केन्द्रले शनिबार काठमाडौंको भृकुटीमण्डप प्रदर्शनीमार्गमा आयोजना गरेको खबरदारीसभामा श्रेष्ठले भने, 'लोकतन्त्रमाथि प्रहार भइरहेको छ र अपरहण गर्ने कुचेष्टा जारी छ ।'

लोकतन्त्रमाथि प्रहार गर्नेहरूले असंवैधानिक रूपमा विगतमा प्रतिनिधिसभा विघटन गरेझैं त्यो खतरा अहिले पनि कायम रहेको श्रेष्ठको भनाइ थियो । 'हिजो प्रतिनिधिसभालाई असंवैधानिक रूपमा विघटन गर्ने प्रतिगामी कार्यलाई असफल बनायौं । आज पनि त्यस प्रकारको खतरा शून्य भइसकेको छैन,' श्रेष्ठले भने, 'ऐतिहासिक परिवर्तनका उपलब्धि र संघीय लोकतान्त्रिक गणतन्त्रलाई रक्षा गर्नुछ ।'