काठमाडौँ — एमालेले पूर्वमाओवादी पृष्ठभूमि भएका एमाले स्थायी कमिटी सदस्य मणि थापालाई पदमुक्त गरेको छ । पार्टीमा लामो समयदेखि निष्क्रिय रहेको भन्दै उनलाई एमालेले बिहीबारको सचिवालय बैठकबाट पदमुक्त गरेको हो । 

एमालेको मूल नेतृत्व (केपी शर्मा ओली) को कार्यशैली र विचारसँग असहमत भएपछि थापा पार्टीमा निष्क्रिय थिए । ‘पार्टीको विधानले लगातार तीन वटा बैठकमा बिनाजानकारी अनुपस्थित भए पदमुक्त गर्ने प्रावधान छ । उहाँ लामो समय पार्टीका काममा निष्क्रिय भएकाले स्वतः पदमुक्त हुनुभएको हो,’ स्थायी कमिटी सदस्य एवं प्रचार विभाग प्रमुख राजेन्द्र गौतमले भने, ‘मणिजी गत निर्वाचनमा पनि पार्टीको काममा खट्नु भएन । उहाँ साहित्य सिर्जनामा बढी व्यस्त हुनुहुन्छ होला ।’ 

थापाले भने आफूले गत वर्ष राजीनामा दिइसकेको उल्लेख गरे । ‘पार्टीको मुख्य कुरा विचार र कार्यशैली हो । त्यसमा सहमत हुन नसकेपछि मैले राजीनामा दिएको थिएँ,’ उनले भने, ‘एमालेले त्यसलाई स्वीकृत गर्न ढिला गरेको थियो । स्वीकृत भएछ, राम्रो भयो ।’ 

नेतृत्वको विचार र कार्यशैलीमा सहमत हुन नसकेपछि त्यहाँ बसिरहनुको औचित्य नहुने थापाको भनाइ छ । एमालेले लिएको राजनीतिक दिशा अपेक्षाअनुसार नभएको पनि उनले बताए । उनले आगामी दिनमा पनि आफू राजनीतिमै केन्द्रित हुने जनाए । ‘जनपक्षीय राजनीतिमै रहनेछु,’ उनले भने । थापाले पार्टीको काम छाडेर गत वर्ष वैशाखमा देशव्यापी जनजागरण सांस्कृतिक अभियान चलाएका थिए । उनको उक्त गतिविधिप्रति ओली असन्तुष्ट थिए ।