राष्ट्रपतिमा नाम चर्चामा ल्याउनु एउटा कुरा, टुंगोमा पुग्नु अर्कै कुरा : माधव नेपाल

सोमबार प्रधानमन्त्री पुष्पकमल दाहालसँग सिंहदरबारमा भेटेपछि अध्यक्ष नेपालले सञ्चारकर्मीहरूसँग कुरा गर्दै मुल कुरा राष्ट्रिय सहमति भएको बताए ।

सञ्चारकर्मीहरूले 'तपाइँको नाम पनि चर्चामा आएको छ के कुरा भयो ?' भनी सोधेको प्रश्नको जवाफमा उनले भनेका थिए, 'चर्चा त धेरैको छ । चर्चामा ल्याउने कुरा एउटा हो,कुरा टुंगोमा पुर्‍याउनु अर्को कुरा हो ।'

उनले राष्ट्रपतिमा राष्ट्रिय सहमति हुनुपर्ने र त्यसको पहल प्रधानमन्त्रीले गर्नुपर्ने सुझाव दाहाललाई दिएका छन् । 'राष्ट्रिय सहमतिको उम्मेदवार आउनुपर्छ । यसका लागि सबै पहल प्रधानमन्त्रीले गर्नुपर्छ,' अध्यक्ष नेपालले भने,'हाम्रोबीचको सम्बन्ध बलियो होस्, लामो यात्रामा जाऔं भनेर मैले प्रधानमन्त्रीलाई भनेको छु ।'

फागुन अन्तिम साता राष्ट्रपति निर्वाचन हुँदैछ । यसका लागि प्रमुख दलका शीर्ष नेताहरूले पछिल्लो समय भेटघाट तीव्र बनाएका छन् । प्रधानमन्त्री दाहालले भने सोमबार मात्रै १२ बुँदे सम्झौताका बेला एकै ठाउँमा रहेका दलहरू राष्ट्रपति निर्वाचनको समयमा पनि एक ठाउँमा उभिनुपर्ने प्रतिक्रिया दिएका थिए ।