३०.१२°C काठमाडौं
काठमाडौंमा वायुको गुणस्तर: १५९

सरकारी सर्भर डाउन भएकोमा चासो राख्दै नीतिगत सुधार गर्न प्रधानमन्त्री दाहालको निर्देशन

‘साइबर सुरक्षा कसरी गर्ने, एकीकृत डाटा प्रणाली कसरी व्यवस्थित गर्ने, सूचना प्रणालीलाई कसरी एकीकृत र प्रभावकारी बनाउने भन्नेमा हामी छौं । सर्भर डाउन भएको घटनाबाट पनि हामीले शिक्षा लिन सक्नुपर्छ । त्यसका लागि नीतिगत र व्यवथापकीय क्षेत्रमा सुधार आवश्यक छ ।'

काठमाडौँ — सरकारी निकायका सर्भर डाउन भएर सेवा नै ठप्प हुने अवस्था आएकोप्रति प्रधानमन्त्री पुष्पकमल दाहालले चासो राख्दै यस सम्बन्धी नीतिगत सुधार गर्न निर्देशन दिएका छन् । गत शनिबार सरकारी सेवाका सर्भर डाउन हुँदा अध्यागमन लगायत सार्वजनिक सेवा ठप्प भएको थियो ।

सरकारी सर्भर डाउन भएकोमा चासो राख्दै नीतिगत सुधार गर्न प्रधानमन्त्री दाहालको निर्देशन

यसबारे अहिलेसम्म के भएको भन्नेबारे यकिन जानकारी सार्वजनिक गरेका छैनन् । उक्त अवस्थाप्रति प्रधानमन्त्री दाहालले मंगलबार दिउँसो प्रधानमन्त्री तथा मन्त्रिपरिषद्‍को कार्यालय मातहतका निकायहरूको बैठकमा चासो राखेका हुन् । यस क्रममा प्रधानमन्त्री दाहालले देशमा उच्चस्तरीय प्रशासन सुधार आवश्यक भएको बताएका छन् ।

उनले भने, ‘उच्चस्तरीय प्रशासन सुधार कार्यदल बनाउने कुरामा मेरो ध्यान गएको छ । अनावश्यक कार्यालय हटाउने, दोहोरो कार्यबोझ हटाउने, अनावश्यक कर्मचारी र खर्च घटाएर प्रशासनयन्त्र र सेवा प्रवाहलाई चुस्त बनाउन आवश्यक छ ।’

यस्तै उनले साइबर सुरक्षा कसरी गर्ने, डेटा प्रणाली कसरी व्यवस्थित गर्ने, सूचना प्रणालीलाई कसरी प्रभावकारी बनाउने लगायत विषयमा आफूहरू लागिरहेको बताएका थिए ।

‘साइबर सुरक्षा कसरी गर्ने, एकीकृत डाटा प्रणाली कसरी व्यवस्थित गर्ने, सूचना प्रणालीलाई कसरी एकीकृत र प्रभावकारी बनाउने भन्नेमा हामी छौं । सर्भर डाउन भएको घटनाबाट पनि हामीले शिक्षा लिन सक्नुपर्छ । त्यसका लागि नीतिगत र व्यवथापकीय क्षेत्रमा सुधार आवश्यक छ । त्यसका लागि नियमित बैठक र छलफल गर्नुपर्छ । बैठक र छलफल भएपछि मात्र समस्या कहाँ छ, समाधान कसरी गर्ने भन्ने थाहा हुन्छ । त्यसका लागि हामी सबै गम्भीर बनौं,’ प्रधानमन्त्री दाहालले भनेका छन् ।

यसैबीच उनले देश अहिले पनि अप्ठेरो अवस्थामै रहेको भन्दै आफूहरूले गम्भीर रुपमा काम गरेर परिणाम नदिए राष्ट्रको आवश्यकता सम्बोधन गर्न नसकिने चिन्ता व्यक्त गरेका थिए । तर अहिले मिलेर देश बनाउने र यस्तो अवस्था सुधार गर्ने सरकारका लागि अवसर भएको पनि उनको भनाइ थियो ।

बैठकलाई सम्बोधन गर्दै प्रधानमन्त्री दाहालले आफ्नो तेस्रो कार्यकाल सिंहदरबारबाटै चलाउने पनि बताए । यसअघि सिंहदरबार बाहिर वा निवासबाटै शासन चलाउने गरेको प्रसंग जोड्दै उनले यसपटक त्यो गल्ती नदोहोर्‍याउने बताए । विशेष परिस्थितिमा बाहेक सिंहदरबारबाटै काम गर्ने सोच बनाएको उनको भनाइ थियो ।

‘यसपटक सिंहदरबारबाटै शासनको नेतृत्व गर्ने सोचेको छु, यसको विशेष अर्थ छ’, प्रधानमन्त्री दाहालले भने, ‘प्रधानमन्त्रीले सिंहदरबारबाट काम गर्नु भनेको राज्यका सबै अंगहरूको एकीकृत परिचालनको नेतृत्व गर्नु हो । राज्यका सबै अंगलाई जवाफदेही र उत्तरदायी बनाउनु पनि हो, दण्ड र पुरस्कारको व्यवस्थित प्रणाली स्थापित गर्नु हो ।’

उनले यसपटक आफूले नयाँ अठोटका साथ सरकारको नेतृत्व गरेको भन्दै सुशासन, सामाजिक न्याय र समृद्धिको आकांक्षा पूरा गर्ने कुरालाई गम्भीर रुपमा लिएको बताए ।

बैठकमा बोल्दै नेपाल सरकारका मुख्यसचिव शंकरदास बैरागीले प्रधानमन्त्रीको सक्रियताले आफूहरूमा काम गर्ने उर्जा प्राप्त भएको प्रतिक्रिया दिएका थिए । उनले कागजमा उल्लेख गरेका विषय परिणाममा देखिनुपर्नेमा सबै सचेत हुनुपर्ने बताएका थिए । 'प्रधानमन्त्रीज्यूले काम गर्ने राम्रो वातावरण बनाउनुभएको छ । यो हामी सबैका लागि राम्रो अवसर हो । प्रधानमन्त्रीज्यू यसपटक केही गरेर छोडौँ भन्नेमा हुनुहुन्छ । त्यसले हामीलाई पनि उर्जा दिएको छ । त्यसका हामी सबैको पनि उच्च मनोवलका साथ क्रियाशीलताको खाँचो छ,’ मुख्यसचिव बैरागीले भने ।

प्रकाशित : माघ १७, २०७९ १९:५०
प्रतिक्रिया
पठाउनुहोस्
जनताको राय

भारतका २ ब्रान्डका गुणस्तरहीन मसला आयतमा प्रतिबन्ध लागेको छ । अन्य खाद्य सामग्रीबारे पनि अब सरकारले मुख्य रुपमा के गर्नुपर्छ ?