कार्यदल संयोजक भुसाल भन्छन् : मिटरब्याजी सुदखोरबारे अनुसन्धान सुरू भइसक्यो- समाचार - कान्तिपुर समाचार

कार्यदल संयोजक भुसाल भन्छन् : मिटरब्याजी सुदखोरबारे अनुसन्धान सुरू भइसक्यो

कान्तिपुर संवाददाता

काठमाडौँ — सरकारी कार्यदल र नवलपरासीका मिटरब्याजी सुदखोर पीडितहरूबीचको वार्ता बिनानिष्कर्ष टुंगिएको छ । कार्यदलले प्रमाण संकलन र अनुसन्धान अगाडि बढाउने आश्वासन दिँदै घर फर्किन आग्रह गरेको छ । सरकारी कार्यदलका संयोजक गृह मन्त्रालयका सहसचिव भीष्म भुसालले पीडितहरूका कुरा सुनेपछि शुक्रबारबाटै अनुसन्धानसमेत सुरु भइसकेको बताए ।

‘उहाँहरूले बताएअनुसार समस्या एकदमै जटिल छ । हामीले उहाँहरूको समस्याको संवेदनशीलता बुझेर काम गर्ने प्रतिबद्धता जनाएका छौँ,’ भुसालले भने, ‘यो अपराध हो, हामीले सबै प्रक्रियाहरू सार्वजनिक गर्ने कुरा हुदैन । तर, हामीले आजैदेखि प्रमाण संकलन थालिसकेका छौँ । अर्को हप्ता फिल्डमै जान्छौँ, र अनुसन्धान गर्छौँ ।’

उनले कार्यदलले काम थालिसकेको भन्दै पीडितहरूलाई आफूले घर जान आग्रह गरेको बताए ।

पश्चिम नवलपरासीका मिटरब्याजीबाट पीडित ७३ जनाले ९ दिनअघि काठमाडौंको माइतीघरमा धर्ना दिइरहेका छन् । त्यसबारे विभिन्न सञ्चार माध्यममा समाचार प्रकाशित भएपछि शुक्रबार बिहान प्रधानमन्त्री शेरबहादुर देउवाले गृहमन्त्री बालकृष्ण खाँणसहित सुरक्षा अधिकारीहरूलाई बोलाएर मिटरब्याजी सुदखोर पीडितहरूको विषयमा अनुसन्धान गरी दोषीलाई कारबाहीको दायरामा ल्याउन निर्देशन दिएका थिए ।

त्यसपछि शुक्रबारै गृहमन्त्री खाँणले मन्त्रालयका सहसचिव भीष्म भुसालको संयोजकत्वमा ६ सदस्यीय कार्यदल गठन गरेका हुन् । लगत्तै शुक्रबारै कार्यदलले पीडितहरूलाई सिहंदरबारमा बोलाएर वार्ता गरेको हो ।

सम्बन्धित समाचार

प्रकाशित : श्रावण २७, २०७९ १७:५९
प्रतिक्रिया
पठाउनुहोस्

कांग्रेस सभापति देउवाले बोलाए कार्यसम्पादन समिति बैठक

कान्तिपुर संवाददाता

काठमाडौँ — नेपाली कांग्रेसका सभापति शेरबहादुर देउवाले शनिबार बिहानका लागि केन्द्रीय कार्यसम्पादन समितिको बैठक बोलाएका छन् । सभापति देउवाले शनिबार बिहान ९ बजे पार्टी केन्द्रीय कार्यालय सानेपामा कार्यसम्पादन समितिको बैठक बोलाएको प्रवक्ता प्रकाशशरण महतले जानकारी दिए ।

उनका अनुसार बैठकमा आगामी निर्वाचन तयारी, निर्वाचन प्रयोजनका लागि दल दर्ता, भदौ २ देखि २४ गतेसम्म देशव्यापी सञ्चालन हुने संगठन सुदृढीकरण अभियान, यही साउन ३० र ३१ गते हुने जनप्रतिनिधिहरुको भेलाको विषयमा छलफल हुनेछ ।

सरकारले आगामी मंसिर ४ गतेका लागि प्रतिनिधिसभा र प्रदेशसभा निर्वाचन गर्ने घोषणा गरिसकेको छ ।

प्रकाशित : श्रावण २७, २०७९ १७:५५
पूरा पढ्नुहोस्
प्रतिक्रिया
पठाउनुहोस्
×