सबै विद्यालय बन्द गर्ने सरकारको निर्णय, परीक्षा स्थगित गर्ने सीसीएमसीको सिफारिस पारित- समाचार - कान्तिपुर समाचार

सबै विद्यालय बन्द गर्ने सरकारको निर्णय, परीक्षा स्थगित गर्ने सीसीएमसीको सिफारिस पारित

कान्तिपुर संवाददाता

काठमाडौँ — कोरोना भाइरसको संक्रमण बढ्दै गएको र त्यो नियन्त्रणबाहिर जाने लागेको भन्दै सरकारले अर्को निर्णय नभएसम्म मुलुकभरका सबै विद्यालय बन्द गर्ने निर्णय गरेको छ । मन्त्रिपरिषद्को सोमबारको बैठकले उक्त निर्णय लिएको मन्त्रीहरूले जानकारी दिएका छन् ।

मन्त्रिपरिषद्को बैठक । फाइल तस्बिर ।

'यसअघि नै विद्यालय बन्द गर्ने निर्णय भइसकेको छ । भर्चुअल माध्यमबाट मात्रै कक्षा सञ्चालन गर्नू भन्ने निर्देशन पनि भइसकेकोमा आजको बैठकले सोही निर्णयलाई निरन्तरता दिएको हो,' एक मन्त्रीले भने ।

त्यस्तै, सबै प्रकारका परीक्षा स्थगित गर्न सीसीएमसीले गरेको सिफारिस पनि मन्त्रिपरिषद्को बैठकले पारित गरेको छ ।

पहाडी क्षेत्रमा २०० र सहरी क्षेत्रमा ५०० भन्दा बढी सक्रिय संक्रमित भएमा निषेधाज्ञा लगाउनुपर्ने सीसीएमसीको सिफारिस पनि मन्त्रिपरिषद्को बैठकले पारित गरेको अर्का एक मन्त्रीले जानकारी दिए ।

'नेपाल ट्रान्जिट बनाएर तेस्रो मुलुक जाने क्रम रोक्ने, विदेशबाट आउनेलाई १० दिन क्वारेन्टाइनमा राख्ने लगायतका निर्णय भएका छन्,' ती मन्त्रीले जानकारी दिए ।


प्रकाशित : वैशाख १३, २०७८ २०:३१
प्रतिक्रिया
पठाउनुहोस्

मन्थलीको भ्यागुरे पाखामा डढेलो

टीकाप्रसाद भट्ट

रामेछाप — मन्थली नगरपालिका-१ भ्यागुरे पाखामा दुई घण्टाअघि देखि लागेको डढेलो बस्ती नजिकै पुगेको छ । लिसिमपानीमा केहि घर रहेको क्षेत्रलाई घेरेर डढेलो लागेको छ । 

नेपाल विद्युत प्राधिकरणको खिम्ती–ढल्केबर २२० केभी प्रशारण लाइन भएको स्थानमा अहिले डढेलो लागिरहेको छ ।

उक्त लाइन नजिकै जोडिएका २ वटा घरतिर डढेलो जान लागेकोले त्यसलाई जोगाउन प्रयत्न भइरहेको जिल्ला प्रहरी कार्यालय रामेछापका प्रहरी नायब उपरीक्षक नवराज ढुंगानाले बताए ।

प्रहरी र स्थानीय बासिन्दा डढेलो नियन्त्रण गर्ने कार्यमा खटेका छन् ।

प्रकाशित : वैशाख १३, २०७८ २०:२७
पूरा पढ्नुहोस्
प्रतिक्रिया
पठाउनुहोस्
×