घर खर्च नचलेपछि ‘लाहुर’- समाचार - कान्तिपुर समाचार
कान्तिपुर वेबसाईट
AdvertisementAdvertisement

घर खर्च नचलेपछि ‘लाहुर’

वीरेन्द्र केसी

अर्घाखाँची — कोभिड–१९ का कारण भारतमा रोजगारी गुमेपछि गुल्मीको मदाने गाउँपालिका–३ का पुनाराम विक वैशाखमा घर आएका थिए । मंगलबार गाउँका दुई युवासगै उनी रोजगारी खोज्दै फेरि भारत फर्किएका छन् । ‘परिवार पाल्ने खर्च जुटाउन भारत नगई उपाय भएन,’ विकले भने, ‘पहिला काम गर्ने कम्पनीले अहिलेसम्म बोलाएन, अब दिल्ली पुगेर नयाँ काम खोज्ने हो ।’

चार महिना बेरोजगार भएर बस्दा घरमा चुलो बाल्न मुस्किन हुन लागेकाले फेरि दिल्लीमै काम खोज्न हिँडेको उनले बताए । दिल्ली पुगेर केही काम खोज्ने र चामल किन्न अर्को महिना घरमा पैसा पठाइदिने उनले बताए । एक महिनापछि दसैं आउँदै छ । ‘खाने खर्च नै नभएपछि दसैं खल्लो हुन्छ, त्यसैले पैसा कमाउन हिँडे,’ उनले भने, ‘दसैं मनाउन ५ हजार ऋण खोजेर श्रीमतीलाई दिएको छु । मैले दिल्लीमै ठूलाबुबाको हातबाट टीका लगाउँछु ।’

उनीसँगै हिँडेका ३६ वर्षीय भीम नेपालीले गाउँमै तरकारी खेती गर्थे । तर, कोरोनाका कारण बजार बन्द भएपछि किनिदिने मान्छे कोही भएन । दुई क्विन्टल बन्दासहित गोलभेंडा र करेला बिक्री नभएपछि भैंसीलाई ख्वाएको उनले बताए । ‘बिक्री हुन्थ्यो भने तरकारीबाट कम्तीमा ५० हजार कमाइ हुन्थ्यो,’ उनले भने । गाउँमा डकर्मीको काम पनि गर्ने उनले घर निर्माण ठप्प भएपछि भारत जाने निर्णय गरेका हुन् ।

सोही गाउँकै अर्का युवा विक्रम नेपाली चैतमा भारतको करनालबाट घर आएका थिए । ६ महिनसम्म घरमा बस्दा कमाएजतिको सबै सकियो । ‘यस वर्ष घरमै बसेर दसैं मनाउने रहर थियो तर बेरोजगार भएर कसरी बस्नू,’ उनले भने, ‘गाडी चलेपछि म हिँडेँ । नोकरीमा हाजिर भएपछि महिनाको नेपाली २६ हजार कमाइ हुन्छ ।’ त्यही कमाइले करनालमा आफू, घरमा बुबाआमा, श्रीमती र तीन छोराछोरी पालिन्छन् । ‘१३ वर्षदेखि गर्दै आएको जागिर छुट्ने चिन्ताले दसैं नमनाई हिँडेँ, अर्को सालको दसैं परिवारसित मनाउनुपर्ला,’ उनले भने ।

अर्घाखाँची सिद्धाराका धनबहादुर विक २ लाख ऋण तिर्न जेठो छोरा लिएर सोमबार भारततर्फ लागे । कोरोना भन्दै घरमा बस्दा खानेखर्च सकियो । ऋणको ब्याज खप्टिदै गयो । ‘कोरोनासँग डराएर के गर्नु ? यहाँ रोगभन्दा भोककै चिन्ता छ,’ उनले भने, ‘पैसा नभएपछि दोकानदारले चामल दिँदैनन् अनि के खाएर बाँच्ने ?’ दिल्लीमा सानाबुबाले जागिर खोजिदिने आशाले बाबुछोरा परदेश लागेको उनले बताए । उनका छोरा नवीन एसईई उत्तीर्ण गरी घरमा बसेका थिए । पढ्ने इच्छा भए पनि घरको आर्थिक अवस्था कमजोर र ऋण भएका कारण कमाउन भारत हिँडेको उनले बताए । ‘आमालाई छाती दुख्ने समस्या छ, औषधिकै भरमा बाँच्नुभएको छ,’ उनले भने, ‘टाउकोमा ऋणको भारी छ, त्यो तिरेर भ्याएपछि बुबालाई घरमा आमाको रेखदेख गर्न पठाउँछु ।’

प्रकाशित : आश्विन ७, २०७७ ११:०७
प्रतिक्रिया
पठाउनुहोस्

‘विश्‍वकै सय प्रभावशाली व्यक्ति’को सूचीमा अभिनेता आयुष्मान खुराना

डाक्टर एन्थोनी फौची, ट्रम्प, मोदी र सी पनि प्रभावशाली व्यक्तिको सूचीमा
कान्तिपुर संवाददाता

काठमाडौँ — बलिउड अभिनेता आयुष्मान खुराना विश्वप्रसिद्ध टाइम म्यागजिनले निकालेको विश्वकै एक सय प्रभावशाली व्यक्तिको सूचीमा परेका छन् । टाइम म्यागजिनले निकालेको सूचीमा कलाकार विधाबाट सन् २०२० का विश्वकै प्रभावशाली सय व्यक्तिमा अभिनेता आयुष्मान पनि परेका हुन् ।

आयुष्मानले टाइमको सूचीमा पर्न पाउनु आफ्ना लागि गर्वको कुरा भएको बताएका छन् । ‘बिक्की डोनर’ बाट डेब्यू गरेका आयुष्मानले ‘अन्धाधुन’, ‘आर्टिकल १५’, ‘शुभ मंगल ज्यादा सावधान’ लगायत चलचित्रमा सशक्त अभिनय गरेका छन् । अभिनेता आय्ुष्मानको प्रशंसामा अभिनेत्री दीपिका पादुकोणले म्यागजिनमा लेखेकी छिन्, ‘डेब्यु चलचित्र बिक्की डोनरबाटै आयुष्मानले बनाएको अलग पहिचानका रुपमा म उनलाई सम्झन्छु । त्यसअघि पनि उनी मनोरञ्जन क्षेत्रमा विभिन्न तरिकाले सक्रिय भए पनि बिर्सन नसकिने फिल्म र पात्रबाट उनले समाजमा एक किसिमको प्रभाव पारेका छन् ।’

त्यस्तै टाइमको सूचीमा पर्ने अन्य कलाकारमा सांगीतिक समूह ‘द विकेन्ड’, सेलेना गोमेज, जोजो सिवा, बोङ जून होलगायत रहेका छन् ।

त्यस्तै कोरोना महामारीपछि विश्वभर चिनिएका अमेरिकाका वरिष्ठ संक्रामक रोग विशेषज्ञ डाक्टर एन्थोनी फौचीलाई टाइमले कोरोना नियन्त्रणका लागि नेतृत्वदायी भूमिका खेलेको भन्दै एक सय प्रभावशाली व्यक्तिको सूचीमा राखेको छ । नेतृत्व विधातर्फबाट अमेरिकी सिनेटर कमला ह्यारिस, ताइवानकी राष्ट्रपति साई इङ वेन, चिनियाँ राष्ट्रपति सी चिनफिङ, अमेरिकी राष्ट्रपति डोनाल्ड ट्रम्प, डेमोक्रेटिक नेता जो बाइडेन, जर्मन चान्सलर एन्जेला मर्केल र भारतीय प्रधानमन्त्री नरेन्द्र मोदीलगायतका व्यक्ति रहेका छन् ।

त्यस्तै भर्खर यूएस ओपन जितेकी टेनिस स्टार नाओमी ओसाका, अमेरिकी एथ्लिट एलिसन फेलिक्स, इजिप्टकी पत्रकार लिना अताल्लाहलगायत व्यक्ति पनि टाइमको सय प्रभावशाली व्यक्तिको सूचीमा परेका छन् ।

प्रकाशित : आश्विन ७, २०७७ १०:५७
पूरा पढ्नुहोस्
प्रतिक्रिया
पठाउनुहोस्
×